ཡུ་ཀེ་རེན་གྱི་ ས་གནས་ཀི་ཡི་རི་ལུ་ ར་ཤི་ཡའི་ མི་ཛ་ཡེལ་གྱིས་ མི་གྲངས་ ༩ ལུ་ ཤི་རྐྱེན་དང་ ༢༩ ལུ་རྨ་སྐྱོན།

ཨཱལ་ཇ་ཟི་ར།
སྤྱི་ཟླ་ ༦ པའི་ཚེས་ ༡༣ ལུ་ ཡུ་ཀེ་རེན་གྱི་ ནང་སྲིད་བློན་པོ་ ཨི་ཧོར་ཀི་ལེ་མེན་ཀོ་གིས་ བཤད་དོ་བཟུམ་འབད་བ་ཅིན་ ཡུ་ཀེ་རེན་གྱི་ ས་གནས་ཀི་ཡི་རི་ཟེར་སར་ ར་ཤི་ཡའི་ མགྱོགས་ཤུགས་ཅན་གྱི་ མི་ཛ་ཡེལ་གྱིས་ སྒྲིང་ཁྱིམ་གཅིག་གུ་ཕོགཔ་ལས་ མི་གྲངས་ ༩ ལུ་ ཤི་རྐྱེན་དང་ ༢༩ ལུ་ རྨ་སྐྱོན་བྱུང་ཡི་ཟེར་ཨིན་པས།
ར་ཤི་ཡ་གིས་ མི་ཛ་ཡེལ་ཐོག་ལས་ གནོད་འཚུབ་བཀལ་ཏེ་ སྒྲིང་ཁྱིམ་རྡིབ་འགྱོ་སར་ གློ་བུར་གྱི་ ལཱ་འབད་མི་ཚུ་གིས་ རྨ་སྐྱོན་བྱུང་མི་ཚུ་ སྲོག་སྐྱབས་འབད་སར་དང་ ཤི་མི་ཚུ་གི་ ཕུངམོ་ཚུ་འཚོལ་སར་ དཔར་ཚུ་གི་ནང་ལས་ སེལ་དོ་ཡོདཔ་ཨིན་པས།
ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟེ་ལེནཛ་ཀི་གིས་ ར་ཤི་ཡའི་ཁ་ཐུག་ལས་ ཡུ་ཀེ་རེན་ལུ་ དྲག་ཐོག་དབང་བཙོང་གི་ བྱ་སྤྱོད་ངན་པ་འབད་བའི་ མངོན་རྟགས་ཚུ་ ཆུ་ཚོད་རེ་རེ་བཞིན་དུའི་ནང་ འཐོན་དོ་ཡོདཔ་ལས་ མཉམ་རོགས་རྒྱལ་ཁབ་ཚུ་ གཅིག་སྒྲིལ་གྱི་སྒོ་ལས་ མཁའ་ཐོག་ཉེན་སྲུང་བཙན་ཐབས་འབད་དགོཔ་འདུག་ཟེར་ བཤདཔ་ཨིན་པས།
ས་གནས་ཀི་ཡི་རི་དེ་ ཡུ་ཀེ་རེན་གྱི་ སྲིད་འཛིན་གྱི་ འཁྲུངས་གཡུས་ཨིནམ་ད་ གཡུས་ཚན་དེ་ནང་ ར་ཤི་ཡ་གིས་ མི་ཛ་ཡེལ་ཐོག་ལས་ གནོད་འཚུབ་བཀལ་བའི་ཤུལ་ལུ་ སྒྲིང་ཁྱིམ་རྡིབ་འགྱོ་སར་ སྲོག་སྐྱབས་འབད་མི་ ལས་བྱེདཔ་ཚུ་གིས་ གསོན་གཤིན་གཉིས་ཆ་ར་ འཚོལ་ཞིབ་འབད་བའི་ བརྙན་ཐུང་ཅིག་ཡང་ མི་སྡེ་བརྡ་བརྒྱུད་ཚུ་ནང་ གསལ་བཀོད་འབད་ནུག།
དེ་མ་ཚད་ ཡུ་ཀེ་རེན་གྱི་ མཉམ་རོགས་རྒྱལ་ཁབ་ཚུ་ལུ་ ར་ཤི་ཡའི་ གནོད་འཚུབ་ཚུ་ བཟློག་ཐབས་ལུ་ མཁའ་ཐོག་ཉེན་སྲུང་རིམ་ལུགས་ཀྱི་ ཅ་ཆས་ཚུ་གི་ དགོས་མཁོ་ཡང་ བཀོད་ཡོདཔ་ཨིན་པས།
ཡུ་ཨེཛ་གི་ཁ་ཐུག་ལས་ མི་ཛ་ཡེལ་གྱི་རིམ་ལུགས་ པེ་ཊི་ཡོ་ཊིག་ མི་ཛ་ཡེལ་ཟེར་མི་ གཏང་ནི་སྦེ་ ཁས་ལེན་གྲུབ་ཡོདཔ་ད་ ད་རེས་ གནོད་འཚུབ་བཀལ་སའི་ ས་གནས་ཀི་ཡི་རི་ལུ་ མི་རློབས་ ༦༣༥,༠༠༠ དེ་ཅིག་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: