ཀེ་ནི་ཡའི་ རྒྱལ་ཁབ་ནང་ ཁྲལ་ཡར་སེང་འབད་བའི་ གནད་ལུ་བརྟེན་ཏེ་ངོ་རྒོལ།

ཨཱལ་ཇ་ཟི་ར།
སྤྱི་ཟླ་ ༦ པའི་ཚེས་ ༢༡ ལུ་ ཀེ་ནི་ཡའི་ རྒྱལ་ཁབ་ནང་ གཞུང་གིས་ ཁྲལ་ཡར་སེང་འབད་བའི་ རྒྱབ་འགལ་ལུ་ རང་དབང་སྡེ་ཚན་ཚུ་གིས་ རྒྱལ་ཡོངས་ཀྱི་གནས་རིམ་ནང་ ངོ་རྒོལ་འབདཝ་ལས་ མི་གྲངས་ ༢༠༠ དེ་ཅིག་ལུ་ རྨ་སྐྱོན་བྱུང་ཡོདཔ་མ་ཚད་ ངོ་རྒོལ་འབད་མི་ཚུ་གི་གྲས་ལས་ མི་གྲངས་ ༡༠༠ ལྷགཔ་ཅིག་ཡང་ ཁྲིམས་སྲུང་འགག་སྡེ་གིས་ འཛིན་བཟུང་འབད་ནུག།
དེ་ཡང་ ཀེ་ནི་ཡའི་རྒྱལ་ས་ ནའི་རོ་བི་ལུ་ ཁྲིམས་སྲུང་དམག་མི་ཚུ་གིས་ མིག་ཆུ་ཐོན་རླུང་དང་ ཀྲོབ་མདའི་ལྡེའུ་ཚུ་གིས་ཕོག་སྟེ་ རྨ་སྐྱོན་བྱུང་ཡོདཔ་ད་ ལ་ལོ་ཅིག་ ཁྲིམས་སྲུང་འགག་སྡེ་ལས་ ཟུར་ཐབས་འབད་བའི་སྐབས་ལུ་ སྣུམ་འཁོར་ཚུ་གིས་ འཐུ་བཀོག་སྟེ་ རྨ་སྐྱོན་བྱུང་ཡོདཔ་ཨིན་པས།
ས་གནས་ཀྱི་ བརྡ་བརྒྱུད་དང་འཁྲིལཝ་ད་ མི་ངོམ་ ༡ ལུ་ ཀྲོབ་མདའ་ཕོགཔ་ལས་ ནའི་རོ་བིའི་ སྨན་ཁང་ནང་ གྱོངས་ཡོདཔ་མ་ཚད་ སྐྱེས་ལོ་ ༢༩ འབད་མི་ ཕོ་སྐྱེས་ ༡ ལུ་ཡང་ ཀྲོབ་མདའ་གིས་ བརླད་དོ་གུ་ཕོག་སྟེ་ སྨན་བཅོས་འབད་བའི་བར་ན་ གྱོངས་སོང་ནུག་ཟེར་ བཀོད་འདུག་པའི་གནས་ཚུལ།

Please follow and like us: