ར་ཤི་ཡའི་ རྒྱལ་ཁབ་ནང་ ཡུ་རོབ་རྒྱལ་ཁབ་ཚོགས་པའི་ བརྡ་བརྒྱུད་ ༨༡ བཀག་དམ།

ཨཱལ་ཇ་ཟི་ར།
འདས་པའི་ཟླཝ་ནང་ བ་ར་སེལཛ་གིས་ ར་ཤི་ཡའི་ གཞུང་འབྲེལ་བརྡ་བརྒྱུད་ ལ་ལོ་ཅིག་ བཀག་དམ་འབད་བའི་ཤུལ་ལས་ ར་ཤི་ཡ་གིས་ཡང་ ཡུ་རོབ་རྒྱལ་ཁབ་ཚོགས་པའི་ འཐུས་མི་རྒྱལ་ཁབ་ཚུ་གི་ བརྡ་བརྒྱུད་ ༨༡ བཀག་དམ་འབད་ནུག།
འཐུས་མི་རྒྱལ་ཁབ་ ༢༧ ཡོད་མི་ ཡུ་རོབ་རྒྱལ་ཁབ་ཚོགས་པ་གིས་ སྤྱི་ཟླ་ ༥ པའི་ནང་ ར་ཤི་ཡ་གིས་ ཡུ་ཀེ་རེན་དང་ ཕྱད་མདའ་རྐྱབ་པའི་སྐོར་ལས་ བརྡ་དོན་རྫུན་མ་ སྤེལ་ཡོདཔ་ལས་ ར་ཤི་ཡའི་ བརྡ་བརྒྱུད་ ༤ བཀག་དམ་འབད་ཡོདཔ་ཨིན་པས།
ར་ཤི་ཡའི་ ཕྱི་འབྲེལ་ལྷན་ཁག་ལས་ ར་ཤི་ཡ་གིས་ ཡུ་ཀེ་རེན་ རྒྱལ་ཁབ་ནང་ བཙན་འཛུལ་འབད་བའི་སྐོར་ལས་ བརྡ་དོན་རྫུན་མ་ཚུ་ རིམ་པ་བཞིན་དུ་ ཁྱབ་སྤེལ་འབདཝ་ལས་ བརྡ་བརྒྱུད་དེ་ཚུ་ བཀག་དམ་འབདཝ་ཨིན་པའི་ གསལ་བཤད་འབད་ནུག།
ད་རེས་ ར་ཤི་ཡ་གིས་ ཡུ་རོབ་རྒྱལ་ཁབ་ ༢༥ གི་ བརྡ་བརྒྱུད་ཚུ་ བཀག་དམ་འབད་མིའི་གྲས་ལས་ མཐོ་ཤོས་ར་ ཕ་རཱནཛ་གི་ བརྡ་བརྒྱུད་ ༩ ཚུད་དེ་ཡོདཔ་ཨིན་པས།
བརྡ་བརྒྱུད་བཀག་དམ་གྱི་གྲས་ཁར་ རྒྱལ་ཁབ་གཞན་ཡང་ ཇར་མ་ནི་དང་ སི་པེན་ ཕིན་ལེན་ ཨ་ཡར་ལེན་ དེ་ལས་ ཨིཊ་ལི་རྒྱལ་ཁབ་ཚུ་ ཚུད་དོ་ཡོདཔ་ད་ ར་ཤི་ཡའི་ ཁ་ཐུག་ལས་ ཡུ་རོབ་རྒྱལ་ཁབ་ཚོགས་པ་གིས་ ར་ཤི་ཡའི་ བརྡ་བརྒྱུད་ཚུ་ བཀག་དམ་ལས་ ཡངས་ཆག་བཏང་པ་ཅིན་ ཁོང་གིས་ཡང་ ཡངས་ཆག་བཏང་ནི་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: