པེ་རིཛ་ལུ་ རྒྱལ་སྤྱིའི་རྩེད་འགྲན་ པ་ར་ལིམ་པིག་གི་ འགོ་འབྱེད་རྟེན་འབྲེལ།

བི་བི་སི།
སྤྱི་ཟླ་ ༨ པའི་ཚེས་ ༢༨ ཀྱི་ཕྱི་རུ་ པེ་རིཛ་ལུ་ པ་ར་ལིམ་པིག་ རྩེད་འགྲན་ ༢༠༢༤ པའི་ འགོ་འབྱེད་རྟེན་འབྲེལ་ནང་ སྒྱུ་རྩལཔ་ཚུ་གིས་ རུ་སྒྲིག་འགྲེམ་སྟོན་ཅིག་ཡང་ འགོ་འདྲེན་འཐབ་ནུག།
དེ་ཡང་ ཨོ་ལིམ་པིག་ རྩེད་འགྲན་དང་དུས་མཉམ་སྦེ་ པ་ར་ལིམ་པིག་གི་ འགོ་འབྱེད་རྟེན་འབྲེལ་དེ་ ཕ་རཱནཛ་གི་རྒྱལ་ས་ པེ་རིཛ་ལུ་ཡོད་མི་ རྩེད་ཐང་གི་ཕྱི་ཁར་ འགོ་འདྲེན་འཐབ་ཡོདཔ་ད་ པ་ར་ལིམ་པིག་ འགྲེམ་སྟོན་དེ་ཁར་ གླ་ཡོན་ག་ནི་ཡང་ མ་བསྡུ་ནི་དེ་གིས་ ལྟདམོ་བལྟ་མི་ ༦༥,༠༠༠ དེ་ཅིག་ སྤུངས་འཛོམས་ཡོདཔ་ཨིན་པས།
སྤྱི་ཟླ་ ༨ པའི་ཚེས་ ༢༩ ལས་ འགོ་བཙུགས་ཡོད་མི་ ཉིན་གྲངས་ ༡༡ གི་ པ་ར་ལིམ་པིག་ རྩེད་འགྲན་ནང་ གྲལ་གཏོགས་འབད་མི་ སྡེ་ཚན་ ༡༦༨ ལས་ རྩེད་འགྲན་པ་ ༤,༤༠༠ དེ་ཅིག་ཡོདཔ་ད་ གསོལ་རས་ཀྱི་ཐེད་ཁར་ རྩེད་འགྲན་ཁག་ ༢༢ ཀྱི་དོན་ལུ་ གསེར་གྱི་རྟགས་མ་ ༥༤༩ ཡོདཔ་ཨིན་པས།
འགོ་འབྱེད་རྟེན་འབྲེལ་ནང་ དབང་པོ་སྐྱོན་ཅན་གྱི་ རིག་རྩལཔ་ཚུ་དང་ ཕ་རཱནཛ་གི་ སྐད་འཐེན་མི་ ཀི་རིཛ་ཊིན་དང་ ཀུ་ཡིནཛ་ཟེར་མི་ཚུ་གིས་ ལྟདམོ་སྟོནམ་དང་གཅིག་ཁར་ ཚོན་ཁྲ་ཅན་གྱི་ དུ་པ་ཚུ་ཡང་ མཁའ་དབྱིངས་ལུ་བཏང་སྟེ་ ཡ་མཚན་ཆེ་ཏོག་ཏོ་སྦེ་ འགོ་འདྲེན་འཐབ་ཅི་ཟེར་ བཀོད་འདུག་པའི་གནས་ཚུལ།

Please follow and like us: