རྒྱལ་ཁབ་ནང་ ཁྲལ་བསྐྱར་བཟོའི་སྐབས་ལུ་ སྣུམ་འཁོར་ཚུ་ལུ་ ཁྲལ་ཡར་སེང་མེད་པའི་མངོན་གསལ།

ཚེ་རིང་ནོར་བུ།
ད་རེས་ནངས་པར་ རྒྱལ་ཁབ་ནང་ སྣུམ་འཁོར་ཚུ་ ནང་འདྲེན་བཀག་དམ་ལས་ ཡངས་ཆག་བཏང་པའི་ཤུལ་ལུ་ སྣུམ་འཁོར་གྱི་ རིན་གོང་ཚུ་ ཡར་སེང་སྦོམ་སྦེ་ར་ འགྱོ་མི་དེ་ སྤྱི་ལོ་ ༢༠༢༢ ལུ་ འདས་པའི་གཞུང་གིས་ ཁྲལ་བསྐྱར་བཟོ་འབད་ནི་དེ་གིས་ཨིན་པའི་ ཁ་ཉེས་བཀལཝ་ཨིན་པས།
ཨིན་རུང་ དངུལ་རྩིས་བློན་པོ་ ལས་སྐྱིད་རྡོ་རྗེ་གིས་ སྣུམ་འཁོར་གྱི་ རིན་གོང་ཚུ་ དེ་སྦེ་ ཡར་སེང་འགྱོ་མི་དེ་ ཁྲལ་བསྐྱར་བཟོ་ལུ་བརྟེན་ཏེ་མིན་པར་ སྣུམ་འཁོར་བཟོ་བསྐྲུན་ཁང་ཚུ་ལས་ར་ རིན་གོང་ཡར་སེང་འགྱོ་བའི་ཁར་ ནང་འདྲེན་འབད་བའི་སྐབས་ལུ་ སྐྱེལ་འདྲེན་གྱི་ གླ་ཆ་དང་ ཕྱི་དངུལ་བརྗེ་སོར་ཚུ་ཡང་ ཡར་འཕར་འགྱོ་བའི་ གནད་ལུ་བརྟེན་ཏེ་ཨིནམ་སྦེ་གསུངས་ཡི།
དེ་ཡང་ དངུལ་རྩིས་བློན་པོ་གིས་ སྤྱི་ཟླ་ ༨ པའི་ཚེས་ ༣༠ ལུ་ ཟླ་རིམ་གནས་ཚུལ་ཞལ་འཛོམས་ནང་ བརྡ་བརྒྱུདཔ་ཚུ་ལུ་ གསུངས་ཡོདཔ་ད་ དེ་སྦེ་ རིན་གོང་སྦོམ་སྦེ་ར་ ཡར་སེང་འགྱོ་མི་ལུ་ གཞུང་གི་ཁ་ཐུག་ལས་ ཚོགས་ཆུང་ཅིག་ གཞི་བཙུགས་འབད་དེ་ དབྱེ་ཞིབ་འབད་བའི་སྐབས་ལུ་ མངོན་གསལ་བྱུང་ནུག།
དངུལ་རྩིས་བློན་པོ་ ལས་སྐྱིད་རྡོ་རྗེ་གིས་འབད་བ་ཅིན་ སྣུམ་འཁོར་ཤུགས་ཚད་སི་སི་ ༡༠༠༠ འབད་མི་ལུ་ ཁྲལ་ཡར་སེང་མ་འབད་བའི་གུ་ ཊོ་ཡོ་ཊ་སྣུམ་འཁོར་བཱཛ་ཚུ་ལུ་ ཁྲལ་བརྒྱ་ཆ་ ༣༠ མར་ཕབ་འབད་ཡོད་རུང་ སྣུམ་འཁོར་བཱཛ་ཚུ་གི་ གོང་ཚད་དེ་ དངུལ་ཀྲམ་ས་ཡ་ ༡.༩ དེ་ཅིག་ ཡར་སེང་སོང་ནུག་ཟེར་ཨིན་པས།
དེ་སྦེ་ ཡང་སེང་འགྱོ་མི་ཚུ་ཡང་ སྣུམ་བཟོ་སྐྲུན་ལས་སྡེ་གིས་ སྣུམ་འཁོར་ཚུ་ནང་ མཁོ་ཆས་ལེ་ཤ་ཅིག་ སྔར་མེད་གསར་བཙུགས་འབད་དེ་ གོང་ཚད་ཡར་སེང་འབད་བའི་གུ་ ཅ་དམ་གྱི་ཁྲལ་དང་ བཙོང་ཁྲལ་ སྔོ་ལྗང་གི་ ཁྲལ་ཚུ་ལུ་བརྟེན་ཏེ་ ཡར་སེང་སོང་ཡོདཔ་སྦེ་ དངུལ་རྩིས་བློན་པོ་གིས་ གསུངས་ཡོད་པའི་གནས་ཚུལ།

Please follow and like us: