མཐའ་ཡས་ལེན་གྱི་ མི་དབང་རྒྱལཔོ་མཆོག་གིས་ བློན་ཆེན་པེ་ཏོང་ཏ་རཱན་ ཤི་ན་ཝ་ཏ་རའི་ ལྷན་རྒྱས་གཞུང་ཚོགས་ལུ་ངོས་ལེན།

རོའི་ཊརཛ།
སྤྱི་ཟླ་ ༩ པའི་ཚེས་ ༤ ལུ་ མཐའ་ཡས་ལེན་གྱི་ མི་དབང་རྒྱལཔོ་ མ་ཧཱ་ཝ་ཇི་ར་ལོང་ཀཱོན་མཆོག་གིས་ བློན་ཆེན་གསརཔ་ པེ་ཏོང་ཏ་རཱན་ ཤི་ན་ཝ་ཏ་རའི་ ལྷན་རྒྱས་གཞུང་ཚོགས་གསརཔ་ལུ་ ངོ་སལེན་མཛད་གནང་ཡོདཔ་ད་ ལྷན་རྒྱས་གཞུང་ཚོགས་ནང་ འཐུས་མི་ ༣༦ གི་གྲས་ཁར་ འཐུས་མི་གསརཔ་ ༡༢ ཡོདཔ་ཨིན་པས།
འདས་པའི་ཟླཝ་ནང་ ཧེ་མའི་བློན་ཆེན་ སེ་རེ་ཐ་ ཐ་ཝི་སིན་དེ་ ཁྲིམས་འདུན་ཅིག་ལས་ ཧང་སྟོང་མར་ ཕྱིར་དབྱུང་འབད་བའི་ཤུལ་ལུ་ སྤྱི་ཚོགས་ནང་ལས་ ལོ་ན་ཆུང་ཤོས་སྦེ་ སྐྱེས་ལོ་ ༣༨ འབད་མི་ ཨམ་པེ་ཏོང་ཏ་རཱན་དེ་ མཐའ་ཡས་ལེན་གྱི་ བློན་ཆེན་གསརཔ་སྦེ་ བཙག་འཐུ་གྲུབ་ནུག།
བློན་ཆེན་པེ་ཏོང་ཏ་རཱན་གྱི་ སྲིད་དོན་ཚོགས་པ་ ཕིའུ་མཐའ་ཡས་ཀྱིས་ སྤྱི་ལོ་ ༢༠༠༡ ལས་ཚུར་ གཞུང་སྐྱོང་འབད་དེ་ཡོདཔ་ད་ ལྷན་རྒྱས་གཞུང་ཚོགས་གསར་པའི་ནང་ཡང་ དབང་ཤུགས་ཅན་གྱི་ སྲིད་ཚོགས་སྦེ་ གནས་ནི་ཨིན་པས།
ད་རེས་ཀྱི་ ལྷན་གཞུང་གསར་པའི་ནང་ ཧེ་མའི་དངུལ་རྩིས་བློན་པོ་ པི་ཅའི་ཅུན་ཧ་ ཝ་རི་ཇ་དང་ ཕྱི་འབྲེལ་བློན་པོ་ མ་རིཛ་ སང་གི་ཡམ་པོང་ས་ ༢ འཐུས་མི་རང་འཇགས་སྦེ་བཞག་ནུག།
བློན་ཆེན་འོགམ་ ཕུམ་ཐམ་ ཝི་ཅ་ཡ་ཅའི་ལུ་ སྲུང་སྐྱོབ་ཀྱི་ འགན་ཁུར་དང་ ཚོང་འབྲེལ་བློན་པོའི་ཚབ་ལུ་ ཧེ་མའི་ནུས་ཤུགས་བློན་པོ་ ཕིའུ་མཐའ་ཡས་ཀྱི་གྲོས་དཔོན་ པི་ཅའི་ ན་རིབ་ཐ་ཕཱན་ བསྐོས་ཡོདཔ་ཨིན་པས།
འབྱོར་ལྡན་བཟའ་ཚང་ ཤི་ན་ཝ་ཏ་རའི་སྲིད་ཚོགས་ ཕིའུ་མཐའ་ཡས་ཀྱི་ ཁ་ཐུག་ལས་ ལྷན་རྒྱས་གཞུང་ཚོགས་ནང་ བློན་པོ་དང་ བློན་པོ་འོགམ་ཚུ་གིས་གཙོས་པའི་ འཐུས་མི་ ༡༧ ཡོདཔ་ད་ གཞན་མི་ས་སྟོང་ ༡༩ པོ་དེ་ མཉམ་འབྲེལ་སྲིད་ཚོགས་ཚུ་གི་ བགོ་སྐལ་སྦེ་བཞག་ནུག།
བློན་ཆེན་པེ་ཏོང་ཏ་རཱན་དེ་ བློན་ཆེན་བགྲེསཔ་ ཐག་སིན་ཤི་ན་ཝ་ཏ་ར་གི་ བུམོ་ཆུང་ཤོས་དང་ མཐའ་ཡས་ལེན་ལུ་ གོ་གནས་མཐོ་ཤོས་འཆང་མི་ ཨམ་སྲུ་གཉིས་པ་ཨིནམ་ད་ ཁོང་རའི་བཟའ་ཚང་ནང་ལས་འབད་བ་ཅིན་ བློན་ཆེན་གྱི་ གོ་གནས་འཆང་མི་ ཨང་ ༤ པ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: