རྒྱ་པཱན་རྒྱལ་ཁབ་ནང་ ཆརཔ་གིས་གནོད་སྐྱོན།

རོའི་ཊརཛ།
རྒྱ་པཱན་ནོ་ཊོ་ཟེར་སར་ སྤྱི་ཟླ་ ༡ པའི་ནང་ ས་ཡོམ་གྱིས་ གནོད་སྐྱོན་བྱུང་ཡོད་པའི་ཁར་ སྤྱི་ཟླ་ ༩ པའི་ཚེས་ ༢༡ ལུ་ ཆརཔ་ཤུགས་སྦེ་རྐྱབ་སྟེ་ གློག་མེའི་རྒྱུན་ལམ་ཚུ་ཡང་ མེདཔ་ཐལ་ཏེ་ བཟའ་ཚང་ ༥,༠༠༠ ལྷགཔ་ཅིག་ལུ་ གློག་མེ་མེད་པར་ཡོདཔ་ད་ མི་སེར་སྟོང་ཕྲག་ལས་བཅད་དེ་ སྡོད་གནས་སྤོ་དགོ་པའི་ བཀོད་རྒྱ་གནང་ནུག།
ཆརཔ་དེ་ལུ་བརྟེན་ཏེ་ ཝ་ཇི་མ་ཁྲོམ་ཁར་ མི་ ༢ གར་སོང་མེདཔ་ད་ ཆརཔ་དེ་ཡང་ ཆུ་ཚོད་རེར་ མི་ལི་མི་ཊར་ ༡༢༡ དེ་རེ་ རྐྱབ་ཡོདཔ་མ་ཚད་ དེ་བཟུམ་སྦེ་ ཉེ་འདབས་ཀྱི་ས་ཁོངས་ སུ་ཟུ་ཟེར་སར་ཡང་ ཆུ་ཚོད་རེར་ མི་ལི་མི་ཊར་ ༨༤.༥ དེ་རེ་ རྐྱབ་མི་དེ་ སྔོན་ཆད་མ་བྱུང་པའི་ ཚད་གཞི་ཁར་ ལྷོད་དེ་ཡོད་ཟེར་ཨིན་པས།
རྒྱང་མཐོང་ཊི་ཝི་ནང་ ཝ་ཉི་མ་ཁྲོམ་ཁར་ ཧོ་མ་ཅན་གྱིས་ ཆར་ཆུ་གིས་གང་སྟེ་ སྣུམ་འཁོར་ཚུ་ཡང་ ཕྱེད་ཀ་དེ་ཅིག་ ཆུའི་འོག་ལུ་ ཐིམ་སྟེ་ཡོད་སར་ མཐོང་དོ་ཡོདཔ་སྦེ་ གསལ་སྟོན་འབད་ནུག།
ས་གནས་སུ་ཟུ་དང་ ཝ་ཇི་མ་ དེ་ལས་ གཞན་ཡང་ ཉེ་འདབས་ཀྱི་ ས་ཁོངས་ཚུ་ནང་ སྤྱི་ཟླ་ ༡ པའི་ཚེས་ ༡ ལུ་ ས་ཡོམ་སྦོམ་རྐྱབ་ཡོདཔ་ལས་ མི་གྲངས་ ༣༠༠ ལྷགཔ་ཅིག་ལུ་ ཤི་རྐྱེན་བྱུང་ནུག་ཟེར་ བཀོད་འདུག་པའི་གནས་ཚུལ།

Please follow and like us: