མི་དབང་མངའ་བདག་རིན་པོ་ཆེ་དང་ མི་དབང་སྐུ་འཁོར་ལྷན་རྒྱས་ཚུ་ ཨཱཛ་ཊེ་ལི་ཡ་ལུ་ཆིབས་བསྐྱོད།

སྤྱི་ཟླ་ ༡༠ པའི་ཚེས་ ༡༡ གི་དྲོ་པར་ མི་དབང་མངའ་བདག་རིན་པོ་ཆེ་མཆོག་དང་ མི་དབང་སྐུ་འཁོར་ལྷན་རྒྱས་ཚུ་ ཨཱཛ་ཊེ་ལི་ཡའི་མངའ་སྡེ་ སིཌ་ནི་ལུ་ ཕྱག་ཕེབས་གནང་ནུག།
དེ་ཡང་ སྤྱི་ཟླ་ ༡༠ པའི་ཚེས་ ༡༠ ལུ་ མི་དབང་མངའ་བདག་རིན་པོ་ཆེ་མཆོག་ མི་དབང་རྒྱལ་བཙུན་མཆོག་དང་ མི་དབང་རྒྱལ་སྲས་ འཇིགས་མེད་རྣམ་རྒྱལ་དབང་ཕྱུག་ མི་དབང་རྒྱལ་སྲས་ ཨྱོན་དབང་ཕྱུག་ མི་དབང་རྒྱལ་སྲསམོ་ བསོད་ནམས་གཡང་སྒྲོན་དབང་ཕྱུག་ཚུ་གིས་ ཕྱག་ཞུ་སྟེ་ འབྲུག་ལས་ དམིགས་བསལ་གྱིས་ འབྲུག་གི་གནམ་གྲུ་ འཕུར་འགྲུལ་ཐོག་ལས་ ཆིབས་བསྐྱོད་གནང་ཡོདཔ་ཨིན་པས།
མི་དབང་མངའ་བདག་རིན་པོ་ཆེ་མཆོག་ སིཌ་ནི་ལུ་ཕེབས་ད་ ཨཱཛ་ཊེ་ལི་ཡའི་ མངའ་སྡེའི་གཙོ་འཛིན་སྤྱི་ཁྱབ་ ཨམ་སམ་མོཛ་ཊིན་གྱིས་ སིཌ་ནི་ལུ་ཡོད་མི་ མོ་རའི་གཞུང་འབྲེལ་གཟིམ་ཅུང་ ཨེཌ་མི་རལ་ཊི་ནང་སྦེ་ ཕེབས་བསུ་ཞུ་ནུག།
དེ་ལས་ སྤྱི་ཟླ་ ༡༠ པའི་སྤྱི་ཚེས་ ༡༢ ལུ་ མི་དབང་མངའ་བདག་རིན་པོ་ཆེ་མཆོག་གིས་ སིཌ་ནི་དང་ ཉེ་འདབས་ཀྱི་ ས་གནས་ཚུ་ནང་སྡོད་མི་ འབྲུག་མི་ཚུ་དང་གཅིག་ཁར་ མཇལ་ཕྲད་མཛད་གནང་ཡོདཔ་ད་ དེ་ཡང་ འབྲུག་མི་ཚུ་དང་ མཇལ་ཕྲད་མཛད་ནི་གི་ ལས་རིམ་ཚུ་གི་གྲས་ལས་ དང་པ་ཨིན་པས།
ཨཱཛ་ཊེ་ལི་ཡའི་མངའ་སྡེ་ སིཌ་ནི་ལུ་ མི་དབང་མངའ་བདག་རིན་པོ་ཆེ་མཆོག་ མཇལ་བར་བཅར་མི་ འབྲུག་མི་ཚུ་གིས་ རྡོ་རྗེ་སློབ་དཔོན་དང་ གཞུང་གྲྭ་ཚང་གིས་ ཆེད་དུ་དམིགས་ཏེ་ ཨཱཛ་ཊེ་ལི་ཡ་ལུ་ བསྣམས་བྱོན་མི་ ནང་རྟེན་བྱིན་ཅན་ཚུ་ཡང་ མཇལ་ནི་གི་ གོ་སྐབས་བཟང་པོ་ ཐོབ་ཡོད་པའི་གནས་ཚུལ།

Please follow and like us: