མི་དབང་མངའ་བདག་རིན་པོ་ཆེ་མཆོག་གིས་ ད་སའི་ཊི་ཀ་དེ་ ཐུགས་སྨོན་ཟབ་མོའི་སྒོ་ལས་ བྱིན་གྱིས་བརླབས་གནང་ཡོདཔ།

སྤྱི་ཟླ་ ༡༠ པའི་ཚེས་ ༨ ལུ་ མི་དབང་མངའ་བདག་རིན་པོ་ཆེ་མཆོག་གིས་ ཧིན་དུའི་ཆོས་ལུགས་ཀྱི་ ད་སའི་ཊི་ཀ་དེ་ ཐུགས་སྨོན་ཟབ་མོའི་སྒོ་ལས་ བྱིན་གྱིས་བརླབས་གནང་ཡོདཔ་ད་ ཊི་ཀ་དེ་ཡང་ དུས་སྟོན་དེ་ བརྩི་སྲུང་ཞུ་མི་ཚུ་གི་དོན་ལས་ རྫོང་ཁག་ཚུ་གི་ནང་ བཀྲམ་སྤེལ་འབད་ནུག།
ད་སའི་དུས་སྟོན་དེ་ཁར་ བཟའ་ཚང་ནང་ མི་རྒས་ཤོས་ཚུ་གིས་ བྱིན་རླབས་དང་ སྲུང་སྐྱོབ་ཀྱི་ བརྡ་མཚོན་པའི་ ཊི་ཀ་དེ་ རང་སོའི་ཨ་ལོ་ཚུ་གི་ དཔྱལ་བར་སྦྱར་དོ་ཡོདཔ་ཨིན་པས།
མི་དབང་ཞབས་ལས་ ལོ་བསྟར་བཞིན་དུ་ ད་སའི་ཊི་ཀ་དེ་ ཐུགས་སྨོན་གནང་སྟེ་ བྱིན་གྱིས་རླབས་གནང་ནི་གི་ སྲོལ་ཡོདཔ་ད་ རྒྱལ་ཁབ་ནང་ ཊི་ཀ་ཐོབ་མི་ བཟའ་ཚང་ཚུ་གིས་ མི་དབང་མངའ་ཞབས་ཀྱི་ བྱིན་རླབས་ཐོབ་ནི་དང་ ཅོག་འཐདཔ་སྦེ་ བརྩིཝ་ཨིན་པས།
ད་སའི་དུས་སྟོན་དེ་ འབྲུག་ལུ་ ཧིན་དུའི་ལྟ་བ་འཛིན་མི་ མི་སྡེ་ཚུ་གི་དོན་ལུ་ ག་ནི་བ་ གལ་ཆེ་བའི་ དུས་སྟོན་ཅིག་ཨིནམ་ད་ དུས་ཅི་ དུས་སྟོན་དེ་ཡང་ སྤྱི་ཟླ་ ༡༠ པའི་ཚེས་ ༣ ལས་ འགོ་བཙུགས་ཏེ་ ཧིན་དུའི་ལྷ་ཁང་ཚུ་ནང་ ཆོ་ག་ཚུ་ གནང་ཡོདཔ་ཨིན་པས།
ཐིམ་ཕུ་ལུ་འབད་བ་ཅིན་ ཆོ་ག་དེ་ ཀུན་གསལ་ཕོ་བྲང་ལུ་ཡོད་མི་ དེ་བི་པཱན་ཅ་ཡཱན་ལྷ་ཁང་ནང་ གནང་ཡོདཔ་ད་ ཊི་ཀའི་ཉིནམ་དེ་ ཆོ་ག་འགོ་བཙུགས་པའི་ཉིན་མ་ལས་ ཉིན་གྲངས་ ༡༠ ལུ་ཨིནམ་ལས་ དུས་ཅི་ སྤྱི་ཟླ་ ༡༠ པའི་ཚེས་ ༡༢ ལུ་ ཕོག་ཡོད་པའི་གནས་ཚུལ།

Please follow and like us: