ཡུ་ཨེཛ་གིས་ ཏ་ཡེ་ཝཱན་ལུ་ ཌོ་ལར་ཐེར་འབུམ་ ༢ ཀྱི་ གོ་མཚོན་ཚོང་སྒྱུར་ལུ་གནང་བ།

རོའི་ཊརཛ།
ཡུ་ཨེཛ་གིས་ ཏ་ཡེ་ཝཱན་ལུ་ ཌོ་ལར་ཐེར་འབུམ་ ༢ གནས་མི་ གོ་མཚོན་ཚུ་ ཚོང་སྒྱུར་འཐབ་ཆོག་པའི་ གནང་བ་གྲོལ་ཡོདཔ་ད་ གོ་མཚོན་ཚུ་ཡང་ དེང་དུས་དང་བསྟུན་པའི་ མཁའ་དབྱིངས་དམག་འཐབ་ཀྱི་ མི་ཛ་ཡེལ་ཚུ་ ཡུ་ཀེ་རེན་ལུ་ བརྟག་དཔྱད་ལག་ལེན་གྲུབ་མི་ཚུ་ཨིན་པས།
དེ་ཡང་ ཡུ་ཨེཛ་དང་ ཏ་ཡེ་ཝཱན་གྱི་བར་ན་ དོན་གཅོད་ཀྱི་ འབྲེལ་བ་མེད་རུང་ ཧེ་མ་ལས་ཡོད་མི་ གོ་དོན་དང་འཁྲིལ་ཏེ་ ཡུ་ཨེཛ་ལུ་ ཏ་ཡེ་ཝཱན་གྱི་ སྲུང་སྐྱོབ་འགན་ཁུར་འཁྲི་ཡོདཔ་ད་ བར་སྐབས་ཅིག་ཁར་ རྒྱ་ནག་གིས་ ཏ་ཡེ་ཝཱན་གྱི་ མཐའ་སྐོར་ལུ་ དམག་སྦྱོང་ཚུ་ འགོ་འདྲེན་འཐབ་སྟེ་ ཏ་ཡེ་ཝཱན་དེ་ རྒྱ་ནག་གི་མངའ་འོག་ལུ་ འཛུལ་དགོ་པའི་ ཨེབ་ཤུགས་རྐྱབ་དོ་ཡོདཔ་ཨིན་པས།
པེན་ཊ་གཱོན་ལས་ སྲུང་སྐྱོབ་མཉམ་འབྲེལ་ལས་སྡེ་གིས་ མི་ཛ་ཡེལ་རིམ་ལུགས་ཀྱི་དོན་ལུ་ ཌོ་ལར་ཐེར་འབུམ་ ༡.༡༦ དང་ འོད་རླབས་རིམ་ལུགས་ཀྱི་དོན་ལུ་ ཌོ་ལར་ས་ཡ་ ༨༢༨ སྦེ་ རྩིས་བཀོད་འབད་ཡོདཔ་སྦེ་བཤད་ནུག།
མི་ཛ་ཡེལ་ རིམ་ལུགས་ཀྱི་གྲས་ཁར་ ས་ཁ་ལས་ གནམ་ཁར་གཏང་ནི་གི་ མི་ཛ་ཡེལ་དང་ མཁའ་དབྱིངས་སྲུང་སྐྱོབ་ཀྱི་ འབྲིང་རིམ་མི་ཛ་ཡེལ་ཚུ་ ད་རེས་ཀྱི་ ཚོང་སྒྱུར་ནང་ ཚུད་དེ་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: