རྒྱལ་ཁབ་ཀྱི་ སློབ་གྲྭ་ཁག་གི་ནང་ གློག་རིག་ཡོངས་འབྲེལ་མཐུད་འབྲེལ།

ཚེ་རིང་རྡོ་རྗེ།
རྒྱལ་ཁབ་ནང་གི་ སློབ་གྲྭ་ ༦༧ གྱི་ ས་ཁོངས་དང་ སློབ་ཁང་ཚུ་ནང་ གློག་རིག་ཡོངས་འབྲེལ་ (ཨིན་ཊར་ནེཊ་) མཐུད་འབྲེལ་འབད་ཡོདཔ་མ་ཚད་ སློབ་གྲྭ་ ༥༦༧ གྱི་ གློག་རིག་ཁང་ཚུ་གི་ནང་ཡང་ གློག་རིག་ཡོངས་འབྲེལ་ མཐུད་འབྲེལ་འབད་ཡོདཔ་ཨིན་པས།
དེ་ཡང་ སྤྱི་ཟླ་ ༡༠ པའི་ཚེས་ ༢༥ ལུ་ བློན་པོ་ལྷན་རྒྱས་ཚུ་དང་ བརྡ་བརྒྱུདཔ་ཚུ་གི་བར་ན་ ཟླ་རིམ་གནས་ཚུལ་ཞལ་འཛོམས་ འཚོགས་པའི་སྐབས་ལུ་ ཤེས་རིག་དང་ རིག་རྩལ་གོང་འཕེལ་བློན་པོ་ ཡིད་བཟང་ཌི་ཐ་པ་གིས་ གསལ་བཤད་གནང་ཡི།
བློན་པོ་ཐ་པ་གིས་ གསུངས་དོ་བཟུམ་འབད་བ་ཅིན་ ད་རེས་ སློབ་ཕྲུག་ ༡༠ རེ་ལུ་ གློག་རིག་ (ཀམ་པུས་ཊར་) རེ་ལས་མེད་རུང་ ལོ་ལྔའི་འཆར་གཞི་ ༡༣ པའི་ ནང་འཁོད་ལུ་ སློབ་ཕྲུག་ ༥ རེ་ལུ་ གློག་རིག་རེ་ བཀྲམ་སྤེལ་འབད་ནི་ཨིན་པའི་གུ་ སློབ་གྲྭ་ག་རའི་ནང་ གློག་རིག་ཡོངས་འབྲེལ་ མཐུད་འབྲེལ་འབད་ནི་གི་ འཆར་གཞི་ཡང་ཡོད་ཟེར་ཨིན་པས།
དེ་བཟུམ་སྦེ་ བརྡ་དོན་དང་ བརྒྱུད་འབྲེལ་འཕྲུལ་རིག་ཚུ་ བཟོ་བཀོད་རིག་པ་དང་ འཕྲུལ་ཆས་ལྷབ་ཐབས་ དེ་ལས་ འཕྲུལ་མི་ཚུ་གི་ཐོག་ལུ་ ཡར་རྒྱས་གཏང་ནི་གི་ འཆར་གཞི་ཡང་ཡོདཔ་ཨིན་པའི་གནས་ཚུལ།

Please follow and like us: