ཏཱ་ཡེ་ཝཱན་ལུ་ རླུང་འཚུབ་ཀྱིས་ གནམ་གྲུ་དང་ མཚོ་གྲུ་ཚུ་ལུ་གནོད་སྐྱོན།

བི་བི་སི།
སྤྱི་ཟླ་ ༡༠ པའི་ཚེས་ ༣༡ ལུ་ ཉིན་མའི་ཆུ་ཚོད་ ༡.༤༠ དེ་ཅིག་ཁར་ ཏཱ་ཡེ་ཝཱན་གྱི་ ཤར་ཕྱོགས་མཚོ་འགྲམ་བདའ་སྟེ་ རླུང་འཚུབ་ཀོང་རེ་ཟེར་མི་ འཕུ་ཡོདཔ་ལས་ གནམ་གྲུ་དང་ མཚོ་གྲུ་བརྒྱ་ལས་བཅད་དེ་ འཕུར་འགྲུལ་འབད་ནི་ཚུ་ མཚམས་འཇོག་འབད་དགོཔ་ཐོན་ནུག།
དེ་བཟུམ་སྦེ་ སློབ་གྲྭ་ཚུ་དང་ ལཱ་གི་ས་ཁོངས་ཚུ་ཡང་ སྒོ་བསྡམས་དགོཔ་ བྱུང་པའི་ཁར་ ཚོང་ཁང་ཚུ་ཡང་ རླུང་འཚུབ་ཀྱིས་ ཅ་ཆས་ཚུ་ འཕྱགས་བདའ་ཡོདཔ་ལས་ སྟོངམ་ཐོན་ཏེ་ཡོདཔ་ད་ མ་གཞི་ རླུང་འཚུབ་ཀྱི་སྐོར་ལས་ སྔ་གོང་གི་ ཉེན་བརྡ་ཚུ་ཡང་ འབད་ཡོདཔ་ཨིན་པས།
རྒྱ་མཚོའི་ཚན་རིག་མཁས་མཆོག་ཚུ་གིས་ དུས་ཅི་ སྤྱི་ཟླ་ ༧ པ་ལས་ཚུར་ རྒྱལ་སྤྱིའི་གནས་རིམ་ནང་ རྒྱ་མཚོའི་དྲོད་ཚད་དེ་ རྒྱ་ཆེ་ཏོག་ཏོ་སྦེ་ར་ ཡར་སེང་སོང་ཡོདཔ་ལས་ ཆར་རླུང་ཚབས་ཆེན་འཐོན་ནི་ལུ་ ཤན་ཞུགས་ཡོདཔ་སྦེ་བཤད་ནུག།
ཏཱ་ཡེ་ཝཱན་ལུ་ དེ་བཟུམ་མའི་ ཆར་རླུང་གི་ རྐྱེན་ངན་དེ་ སྤྱི་ལོ་ ༢༠༠༩ ལུ་ཡང་ ཐོན་ཡོདཔ་ད་ དེ་བསྒང་ ཆུ་རུད་དང་ ས་རུད་ཚུ་ལུ་བརྟེན་ཏེ་ མི་གྲངས་ ༩༠༠ དེ་ཅིག་ལུ་ ཤི་རྐྱེན་བྱུང་ནུག་ཟེར་ བཀོད་འདུག་པའི་གནས་ཚུལ།

Please follow and like us: