སར་བི་ཡ་ལུ་ རེལ་ལིའི་ཐོག་གཡབ་ རམ་སོང་སྟེ་ མི་གྲངས་ ༡༤ ལུ་ཤི་རྐྱེན།

བི་བི་སི།
སྤྱི་ཟླ་ ༡༡ པའི་ཚེས་ ༢ ལུ་ སར་བི་ཡའི་ བྱང་ཕྱོགས་ལུ་ཡོད་མི་ རེལ་ལིའི་ཐོག་གཡབ་ རམ་འགྱོ་བའི་ རྐྱེན་ངན་ནང་ མི་གྲངས་ ༡༤ ལུ་ ཤི་རྐྱེན་བྱུང་པའི་ཁར་ མི་གྲངས་ ༣ ལུ་ཡང་ རྨ་སྐྱོན་བྱུང་ཡོདཔ་ལས་ སྨན་ཁང་ནང་ བསྐྱལ་ཡོདཔ་ཨིན་པས།
སར་བི་ཡའི་སྲིད་འཛིན་ ཨ་ལེག་ཇཱན་ཌར་ ཝུ་ཅིག་གིས་ ཤི་རྐྱེན་བྱུང་མི་དེ་ ཡར་སེང་མི་འཐོན་འོང་མནོ་བའི་ རེ་བ་ཡོདཔ་མ་ཚད་ ཐོག་གཡབ་དེ་དང་འབྲེལ་བའི་ འགན་ཁུར་འབག་མི་ཚུ་ལུ་ཡང་ ཉེས་བྱ་བཀལ་ནི་ཨིནམ་སྦེ་གསུངས་ནུག།
རྐྱེན་ངན་དེ་ནང་ ཤི་རྐྱེན་བྱུང་མི་ཚུ་གི་གྲས་ལས་ ཕུངམོ་ ༥ དེ་ཅིག་ ངོས་འཛིན་འབད་མ་ཚུགས་པར་ཡོདཔ་ད་ སྲིད་འཛིན་གྱིས་འབད་བ་ཅིན་ ཐོག་གཡབ་རམ་མིའི་འོག་ལས་ ཕུངམོ་དེ་ཚུ་ འཚོལ་ནིའི་དོན་ལུ་ སྲོག་སྐྱབས་ཀྱི་ ལཱ་འབད་མི་ ༨༠ དེ་ཅིག་ བཙུགས་ཏེ་ཡོད་ཟེར་ཨིན་པས།
དེ་ལས་ བློན་ཆེན་མི་ལོཛ་ ཝུ་ཅེ་བིག་གིས་ཡང་ ཐོག་གཡབ་རམ་འགྱོ་མི་དེ་ དཀའ་ངལ་ཅན་ཅིག་ཨིནམ་མ་ཚད་ རེས་གཟའ་ཉིམ་དེ་ གཞུང་འབྲེལ་དུ་ མྱ་ངན་ངལ་གསོ་ཨིན་པའི་ གསལ་བསྒྲགས་ཡང་འབད་ནུག་ཟེར་ བཀོད་འདུག་པའི་གནས་ཚུལ།

Please follow and like us: