མི་རྗེ་བློན་ཆེན་མཆོག་གིས་ འཛམ་གླིང་དངུལ་ཁང་གི་ རྒྱལ་ཁབ་མདོ་ཆེན་དང་མཇལ་ཕྲད།

སྤྱི་ཟླ་ ༡༢ པའི་ཚེས་ ༢ ལུ་ མི་རྗེ་བློན་ཆེན་མཆོག་གིས་ བང་ལ་དེཤ་དང་ འབྲུག་གི་དོན་ལུ་ འཛམ་གླིང་དངུལ་ཁང་གི་ རྒྱལ་ཁབ་མདོ་ཆེན་གྱི་ གནས་ཡུན་ཚང་མི་ ཨབ་དུ་ལ་ཡེ་ སེག་དང་གཅིག་ཁར་ མཇལ་ཕྲད་མཛད་ནུག།

དེ་བསྒང་ མི་རྗེ་བློན་ཆེན་གྱིས་ གསུངས་དོ་བཟུམ་འབད་བ་ཅིན་ འབྲུག་རྒྱལ་ཁབ་ཀྱི་ མི་སྡེ་དཔལ་འབྱོར་གོང་འཕེལ་ལུ་ འཛམ་གླིང་དངུལ་ཁང་གིས་ ལོ་ངོ་བཅུ་ཕྲག་གི་བར་ན་ གལ་གནད་ཆེ་བའི་ ཕན་གྲོགས་འབད་མི་ལུ་ བཀའ་དྲིན་དགའ་ཚོར་ཡོད་ལུགས་དང་ ད་ལས་ཕར་ཡང་ མཉམ་འབྲེལ་ཐོག་ལས་ གསར་བཏོད་ཚུ་གི་ མཐར་འཁྱོལ་ངེས་གཏན་བཟོ་ཐབས་ལུ་ འབྲུག་གི་ཁ་ཐུག་ལས་ ཁས་ལེན་ཡོད་ཟེར་ཨིན་པས།

ཨབ་དུ་ལ་ཡེ་གིས་ འཛམ་གླིང་དངུལ་ཁང་གིས་ འབྲུག་དང་གཅིག་ཁར་ མཉམ་འབྲེལ་འཐབ་ནི་ལུ་ དཔའ་ཉམས་བྱུང་ཡོདཔ་མ་ཚད་ འབྲུག་རྒྱལ་ཁབ་ཀྱི་ ཡར་འཕེལ་ལུ་ཡང་ ལེགས་སྨོན་ཡོད་ལུགས་ཚུ་བཤད་ནུག།

མཇལ་ཕྲད་སྐབས་ལུ་ འབྲུག་གི་ཡུན་བརྟན་གོང་འཕེལ་ ཀུན་ཚང་ནང་ འཛམ་གླིང་སྤྱི་ཚོགས་དང་གཅིག་ཁར་ ཡུན་རིང་གི་མཐུན་ལམ་ རྒྱུན་སྐྱོང་འཐབ་སྟེ་ཡོད་མི་ལུ་ གཙོ་བོར་བཟུང་སྟེ་ གསུང་གྲོས་ཚུ་ གནང་ཡོད་པའི་གནས་ཚུལ།