རྒྱ་གར་གྱི་ ལམ་སེལ་ལས་སྡེ་ ཌཱན་ཊག་ལས་འགུལ་དང་ འབྲུག་མེ་རླུང་བཟོ་གྲྭའི་བར་ན་ གོ་བརྡའི་ཆིངས་ཡིག།

སྤྱི་ཟླ་ ༡༢ པའི་ཚེས་ ༢༦ ལུ་ འབྲུག་རྒྱལ་ཁབ་ནང་ གཞི་རྟེན་མཁོ་ཆས་དང་ མཐུད་འབྲེལ་གོང་འཕེལ་ལུ་ རྒྱབ་སྐྱོར་འབད་ནིའི་དོན་ལས་ གལ་གནད་ཅན་གྱི་ ཐབས་ལམ་ཅིག་སྦེ་ རྒྱ་གར་གྱི་ ས་མཚམས་ལམ་སེལ་ལས་སྡེ་ ཌཱན་ཊག་ལས་འགུལ་གྱིས་ འབྲུག་མེ་རླུང་བཟོ་གྲྭ་དང་གཅིག་ཁར་ གོ་བརྡའི་ཆིངས་ཡིག་གུ་ མཚན་རྟགས་བཀོད་ནུག།
མཚན་རྟགས་དེ་ཡང་ ཐིམ་ཕུ་སེམས་རྟོགས་ཁ་ལུ་ཡོད་མི་ ཌཱན་ཊག་ལས་འགུལ་གྱི་ ཡིག་ཚང་གཙོ་ཁང་ནང་སྦེ་ ཌཱན་ཊག་ལས་འགུལ་གྱི་ བཟོ་རིག་གཙོ་འཛིན་འགོ་དཔོན་ དོ་འཛིན་རོ་ཧིཊ་གུབ་ཏ་དང་ འབྲུག་མེ་རླུང་བཟོ་གྲྭ་ལས་སྡེའི་ བཀོད་ཁྱབ་གཙོ་འཛིན་འགོ་དཔོན་ སེངྒེ་རྒྱ་མཚོ་ ༢ ཀྱིས་ བཀོད་ཡོདཔ་ཨིན་པས།
ཆིངས་ཡིག་དེ་ནང་ འབྲུག་རྒྱལ་ཁབ་ནང་འཁོད་ལུ་ འཁོར་ལམ་གྱི་ གཞི་རྟེན་མཐུན་རྐྱེན་ཚུ་ ཡར་དྲགས་གཏང་ནིའི་དོན་ལས་ ཌཱན་ཊག་ལས་འགུལ་གྱིས་ ལམ་རྟགས་བཀལ་ནི་དང་ ཚོན་གཏང་པའི་བསྒང་ཡོད་མི་ཚུ་ནང་ མེ་རླུང་བཀྲམ་སྤེལ་འབད་ཐབས་ལུ་ཨིནམ་སྦེ་ གསལ་བཀོད་འབད་ནུག།
འབྲུག་ལུ་ ཌཱན་ཊག་ལས་འགུལ་དེ་ སྤྱི་ལོ་ ༡༩༦༡ ལོར་ གཞི་བཙུགས་འབད་ཡོདཔ་ད་ དུས་དེ་ལས་ཚུར་ རྒྱ་འབྲུག་རྒྱལ་ཁབ་ ༢ ཀྱི་བར་ན་ མཐུན་ལམ་གཏིང་ཟབ་དང་ ཡུན་བརྟན་ཅན་སྦེ་ གནས་ཏེ་ཡོདཔ་ཨིན་པས།
དེ་ཡང་ ཌཱན་ཊག་ལས་འགུལ་གྱིས་ འབྲུག་གི་ས་གནས་མཐའ་ཟུར་དང་ ལུང་ཕྱོགས་ཚུ་ མཐུད་སྦྲེལ་གྱི་དོན་ལས་ འཁོར་ལམ་དང་ ཟམ་དེ་ཚུ་ བཟོ་སྐྲུན་དང་ རྒྱུན་སྐྱོང་འཐབ་ནི་ལུ་ གལ་ཆེ་བའི་ འགན་ཁུར་ཚུ་ འབག་དོ་ཡོདཔ་ཨིན་པའི་གནས་ཚུལ།

Please follow and like us: