རོ་ཧི་ནེ་ལུ་ མཁའ་དམག་ཐོག་ལས་ དྲག་བཅོམ་འབད་དེ་ མི་སེར་ལེ་ཤ་ཅིག་དམར་བསད།

རོའི་ཊརཛ།
སྤྱི་ཟླ་ ༡ པའི་ཚེས་ ༡༡ ལུ་ འཛམ་གླིང་སྤྱི་ཚོགས་ལས་ བཤད་དོ་བཟུམ་འབད་བ་ཅིན་ མ་ཡན་མར་ དྲག་པོའི་སྲིད་གཞུང་དམག་སྡེ་གིས་ བདུན་ཕྲག་འདི་ནང་ མ་ཡན་མར་གྱི་ ནུབ་ཕྱོགས་མངའ་སྡེ་ རོ་ཧི་ནེ་ལུ་ མཁའ་དམག་ཐོག་ལས་ དྲག་བཅོམ་འབད་དེ་ མི་སེར་བཅུ་ཕྲག་ལེ་ཤ་ཅིག་ དམར་བསད་འབད་ནུག་ཟེར་ཨིན་པས།
དེ་ཡང་ ཤར་ལྷོ་ཨེ་ཤི་ཡའི་ མ་ཡན་མར་ རྒྱལ་ཁབ་ནང་ མི་རིགས་དང་འབྲེལ་བའི་ ནང་འཁྲུག་ལང་སྟེ་ ལོ་ངོ་ ༤ དེ་ཅིག་ ལང་དོ་ཡོདཔ་ད་ རོ་ཧི་ནེ་ལུ་ མི་སེར་དམངས་གཙོའི་གཞུང་ངམ་ ཨ་ར་ཀེན་དམག་སྡེ་ གཞི་བཙུགས་འབད་མི་ཚུ་གིས་ ལུང་ཕྱོགས་དེ་ རང་སྐྱོང་གི་དོན་ལས་ ངོ་རྒོལ་འབདཝ་ཨིན་པས་ཟེར་བཀོད་ནུག།
དེ་བཟུམ་སྦེ་ སྤྱི་ཟླ་ ༡ པའི་ཚེས་ ༩ ལུ་ཡང་ དྲག་པོའི་སྲིད་གཞུང་གིས་ ཡན་བེ་ཁྲོམ་སྡེའི་མངའ་ཁོངས་ ཀེ་ཡུག་ནི་མའུ་ གཡུས་ཚན་ནང་ སྡོད་ཁྱིམ་ ༥༠༠ དེ་ཅིག་ གཏོར་བཏང་པའི་ཁར་ མི་གྲངས་ ༤༠ ལྷགཔ་ཅིག་ཡང་ དམར་བསད་འབད་ནུག་ཟེར་ཨིན་པས།
དེ་མ་ཚད་ མུཛ་ལིམ་གྱི་ གཡུས་ཚན་ནང་ཡང་ མི་གྲངས་ ༢༦ ལུ་ ཤི་རྐྱེན་དང་ ༡༢ ལུ་ རྨ་སྐྱོན་བྱུང་ནུག་ཟེར་ བཀོད་འདུག་པའི་གནས་ཚུལ།

Please follow and like us: