སྲིད་འཛིན་ཊཱམ་གྱིས་ རྒྱལ་སྤྱི་གོང་འཕེལ་ལས་སྡེ་མཚམས་འཇོག།

ཨཱལ་ཇ་ཟི་ར།
སྤྱི་ཟླ་ ༢ པའི་ཚེས་ ༥ ལུ་ ཡུ་ཨེཛ་གི་སྲིད་འཛིན་ ཌོ་ནཱལ་ཊཱམ་གྱི་ གཞུང་གི་ཁ་ཐུག་ལས་ ཡུ་ཨེཛ་རྒྱལ་སྤྱི་གོང་འཕེལ་ལས་སྡེའི་ནང་ ཐད་ཀར་དུ་ ལཱ་གཡོག་ནང་ བསྐོ་བཞག་གྲུབ་མི་ཚུ་ ངལ་གསོ་བཞག་དགོ་པའི་ བཀོད་རྒྱ་གནང་ཡོདཔ་ཨིན་པས།
དེ་ཡང་ གནད་འགག་ཅན་གྱི་ ལཱ་འགན་འབག་མི་དང་ དམིགས་བསལ་གྱིས་ འགོ་ཁྲིད་གཙོ་བོ་དང་ ངོས་འཛིན་གྲུབ་མི་ ལས་རིམ་ཚུ་གི་དོན་ལུ་མ་གཏོགས་ ལས་གཡོགཔ་གཞན་ཚུ་ ངལ་གསོ་སྦེ་ བཞག་ནི་ཨིན་པའི་ཁར་ ཕྱིའི་རྒྱལ་ཁབ་ཚུ་ནང་ཡོད་མི་ ལས་གཡོགཔ་ཚུ་ཡང་ ཉིན་གྲངས་ ༣༠ གི་ ནང་འཁོད་ལུ་ ལོག་འབོ་ནི་ཨིནམ་སྦེ་ གསལ་བསྒྲགས་འབད་ནུག།
རྒྱལ་སྤྱི་གོང་འཕེལ་ལས་སྡེའི་འོག་ལུ་ ལས་གཡོགཔ་ ༡༠,༠༠༠ ལྷགཔ་ཅིག་ལས་ གསུམ་དཔྱ་ ༢ དེ་ཅིག་ ཕྱིའི་རྒྱལ་ཁབ་ཚུ་ནང་ཡོདཔ་ད་ ད་རེས་ ལས་གཡོགཔ་ཚུ་ ངལ་གསོ་བཞག་ནི་ཨིན་པའི་ གསལ་བསྒྲགས་དེ་ཡང་ ལས་སྡེ་དེ་ ཆ་མེད་བཏང་སྟེ་ ལཱ་འགན་ཚུ་ ཡུ་ཨེཛ་རྒྱལ་ཁམས་ལས་ཁུངས་འོག་ལུ་ བསྐྱར་བཀོད་འབད་ནི་གི་ འཆར་གཞི་ཡོདཔ་ཨིན་པས།
མ་གཞི་ སྤྱི་ལོ་ ༢༠༢༣ ལུ་ ཕྱིའི་གྲོགས་རམ་གྱི་འཆར་དངུལ་ ཡུ་ཨེཛ་ཌོ་ལར་ ཐེར་འབུམ་ ༧༢ ལས་ ཕྱེད་ཀ་ལྷགཔ་ཅིག་ བགོ་བཀྲམ་འབད་ཡོད་རུང་ ད་རེས་འབདཝ་ད་ གཞུང་སྐྱོང་ལྕོགས་གྲུབ་ལས་ཁུངས་ཟེར་ རྒྱུ་སྦྱོར་ཅན་ ངོམ་ཨི་ལོན་མཱཛ་གི་ འགོ་ཁྲིད་ཐོག་ལས་ ཟད་འགྲོ་ཕབ་ཆག་གི་དོན་ལུ་ ལས་སྡེ་དེ་ ཆ་མེད་གཏང་ནི་གི་ དམིགས་གཏད་བསྐྱེད་ནུག།
རྒྱལ་སྤྱི་གོང་འཕེལ་ལས་སྡེ་དེ་ སྤྱི་ཚོགས་ནང་ལས་ གཞི་བཙུགས་འབད་མི་ ལས་སྡེ་ཅིག་འབདཝ་ལས་ བཀོད་ཁྱབ་བཀའ་རྒྱའི་ཐོག་ལུ་ ཆ་མེད་གཏང་ནི་དེ་ རྩ་ཁྲིམས་ལས་འགལ་བ་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: