མི་དབང་མངའ་བདག་རིན་པོ་ཆེ་མཆོག་གི་ མཛད་རྣམ་བཅུད་བསྡུས།

མགོན་པོ་རྡོ་རྗེ།

ད་རིས་ སྤྱི་ལོ་ ༢༠༢༥ སྤྱི་ཟླ་ ༢ པའི་ཚེས་ ༢༡ ལུ་ མི་དབང་མངའ་བདག་རིན་པོ་ཆེ་མཆོག་གིས་ དགུང་ལོ་ ༤༥ བཞེས་པའི་ འཁྲུངས་སྐར་དུས་སྟོན་འདི་ཁར་ ང་བཅས་རའི་ འབྲུག་མི་ཡོངས་ཀྱིས་ མི་དབང་མངའ་ཞབས་མཆོག་ལུ་ བཀའ་དྲིན་རྗེས་དྲན་དང་ གུས་བཏུད་ཞུ་ནིའི་དོན་ལས་ མཛད་རྣམ་རྒྱ་མཚོ་ལྟ་བུ་ལས་ ཆུ་ཐིག་ཙམ་ཅིག་ ཞུ་ནི་ཨིན།

དེ་ཡང་ མི་དབང་མངའ་བདག་རིན་པོ་ཆེ་མཆོག་ འབྲུག་མི་ཡོངས་ཀྱི་ བསོད་ནམས་ཀྱི་ བགོ་སྐལ་ལུ་ འབྲུག་བརྒྱུད་འཛིན་གྱི་ མི་དབང་རྒྱལ་རབས་བཞི་པ་མཆོག་དང་ ལྷ་སྲས་གཙང་མ་ལས་བརྒྱུད་པའི་ ཞབས་དྲུང་འཇིགས་མེད་རྡོ་རྗེ་དང་ ཞབས་དྲུང་གསུང་སྤྲུལ་ ཕྱོགས་ལས་ཡེ་ཤེས་དངོས་གྲུབ་མཆོག་གི་ གདུང་བརྒྱུད་ལས་ མི་དབང་རྒྱལ་ཡུམ་ ཚེ་རིང་གཡང་སྒྲོན་དབང་ཕྱུག་མཆོག་གི་སྲས་ལུ་ སྤྱི་ལོ་ ༡༩༨༠ སྤྱི་ཟླ་ ༢ པའི་ཚེས་ ༢༡ ལུ་ མཚན་ལྟས་བཟང་པོ་དང་བཅས་པའི་སྒོ་ལས་ སྐུ་འཁྲུངས་ནུག།

སྐུ་ཡོན་གསན་སྦྱངས།

མི་དབང་མཆོག་ སྐུ་ན་ཆུང་ཀུའི་བསྒང་ལས་ར་ མི་སེར་སྤྱིར་བཏང་གི་ ཨ་ལོ་ཚུ་དང་ ཁྱད་པར་མེད་པའི་ དཀའ་སྤྱད་མཛད་དེ་ ལུང་བསྟན་ཟམ་པ་ འབྲིང་རིམ་སློབ་གྲྭ་བར་མ་དང་ དབྱངས་ཅན་ཕུག་ འབྲིང་རིམ་སློབ་གྲྭ་ཆེ་བའི་ནང་ སློབ་རིམ་ ༡༢ ཀྱི་རིང་ལུ་ སྐུ་ཡོན་གསན་སྦྱངས་ མཛད་ཡོདཔ་ཨིན་པས།

དེ་ལས་ ཨ་མི་རི་ཀ་ ཕི་ལིབཛ་ གཙུག་ལག་སློབ་སྡེ་དང་། མ་ས་ཅུ་སེཊཛ་ལུ་ཡོད་མི་ ཀུ་ཤིང་དང་ ཝི་ཊཱོན་གཙུག་ལག་སློབ་སྡེ། ཨོགཛ་ཕོརཊ་གཙུག་ལག་སློབ་སྡེ་དང་ མེག་ཌ་ལེན་ མཐོ་རིམ་སློབ་གྲྭ་ཚུ་གི་ནང་ལས་ མཐོ་རིམ་དང་ གཙུག་ལག་ཤེས་ཡོན་ཚུ་ རིམ་པ་བཞིན་དུ་ གསན་སྦྱངས་མཛད་ནུག།

དགུང་ལོ་ ༢༠ སྤྱི་ལོ་ ༢༠༠༢ སྤྱི་ཟླ་ ༦ པའི་ཚེས་ ༢༥ ལུ་ མི་དབང་ཡབ་རྗེ་དམ་པ་མཆོག་གིས་ གཞུང་འབྲེལ་གྱི་གོ་གནས་ ན་བཟའ་འབུ་རས་དམརཔོ་ གནང་ཡོདཔ་ད་ དེ་ལས་ མི་དབང་ཡབ་རྗེ་མཆོག་དང་ ཉིན་མཚན་བྲལ་བ་མེད་པར་ བཞུགས་ཐོག་ལུ་ ཆབ་སྲིད་འཛིན་སྐྱོང་སྤེལ་ ༣ དང་ དཔལ་ལྡན་འབྲུག་པའི་ སྒྲིག་ལམ་རྣམ་གཞག་ཚུ་ལུ་ ཞུན་དག་ཡང་དག་ མཛད་ཡོདཔ་ཨིན་པས།

ཀྲོང་གསར་དཔོན་སློབ།

མི་དབང་མཆོག་ དགུང་ལོ་ ༢༤ སྤྱི་ལོ་ ༢༠༠༤ སྤྱི་ཟླ་ ༡༠ པའི་ཚེས་ ༢༡ ལུ་ མི་དབང་ཡབ་རྗེ་དམ་པ་མཆོག་གིས་ བཀྲིས་ཆོས་རྫོང་གི་ གསེར་ཁྲི་ཁང་བཟང་ནང་སྦེ་ ཀྲོང་གསར་དཔོན་སློབ་ ཁྲི་རབས་ ༡༦ པར་ དར་མཛོད་སྣེ་ལྔའི་ ལེགས་དར་གནང་པའི་ཤུལ་ལུ་ ཀུན་རྭའི་ནང་ གདན་འདྲེན་ཞུ་ནུག།

དེ་ལས་ རྗེ་མཁན་ཁྲི་རབས་ ༧༠ པ་ སྐྱབས་རྗེ་རིན་པོ་ཆེ་ སྤྲུལ་སྐུ་འཇིགས་མེད་ཆོས་གྲགས་མཆོག་ དབུ་བཞུགས་ཀྱིས་ གཞུང་དགེ་འདུན་གྲྭ་ཚང་གི་ བླ་སློབ་དང་ འཕགས་པའི་དགེ་འདུནམ་ཚུ་གིས་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་དང་ སྐུ་གསུང་ཐུགས་རྟེན་གྱིས་གཙོས་པའི་ བཀྲ་ཤིས་རྟགས་བརྒྱད་དང་ བཀྲ་ཤིས་རྫས་བརྒྱད་ལ་སོགས་པ་ཚུ་ ཕུལ་གནང་སྟེ་ རྟེན་འབྲེལ་སྦོམ་སྦེ་ བརྩི་སྲུང་མཛད་ཡོདཔ་ཨིན་པས།

དེ་བཟུམ་སྦེ་ ཀྲོང་གསར་རྫོང་ནང་ རྗེ་མཁན་ཁྲི་རབས་ ༦༧ པ་ སྐྱབས་རྗེ་ཉི་སྤྲུལ་འཕྲིན་ལས་ལྷུན་གྲུབ་མཆོག་ དབུ་བཞུགས་ཀྱིས་ ཆོས་རྩེ་རབ་སྡེའི་ བླ་སློབ་དང་ དགེ་སློང་ཚུ་གིས་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་དང་ སྐུ་གསུང་ཐུགས་རྟེན་གྱིས་གཙོས་པའི་ བཀྲ་ཤིས་རྟགས་བརྒྱད་དང་ བཀྲ་ཤིས་རྫས་བརྒྱད་ལ་སོགས་པ་ཚུ་ ཕུལ་གནང་སྟེ་ རྟེན་འབྲེལ་ཕུན་སུམ་ཚོགས་པར་མཛད་ནུག།

དེ་མ་ཚད་ ཐིམ་ཕུ་དང་ ཀྲོང་གསར་གཉིས་ཆ་རའི་ནང་ གླུ་གར་དང་ རྩེད་རིགས་ལ་སོགས་པའི་ དགའ་སྟོན་སྣ་ཚོགས་དང་ བཟའ་འཐུང་ལོངས་སྤྱོད་ཀྱིས་ རྒྱལ་ཁབ་ཕྱི་ནང་གི་ སྐུ་མགྲོན་ཚུ་དང་ མི་སེར་ཚུ་ ཚིམས་ཤིང་ངོམས་པར་ མཛད་གནང་ནུག།

རྒྱལ་པོའི་གསེར་ཁྲིར་མངའ་གསོལ།

སྤྱི་ལོ་ ༢༠༠༥ སྤྱི་ཟླ་ ༡༢ པའི་ཚེས་ ༡༧ ལུ་ འབྲུག་གི་རྒྱལ་ཡོངས་དུས་ཆེན་ བཀྲ་ཤིས་གཡང་རྩེར་ བརྩི་སྲུང་མཛད་གནངམ་ད་ མི་དབང་ཡབ་རྗེ་དམ་པ་མཆོག་གིས་ ཀྲོང་གསར་དཔོན་སློབ་མཆོག་ རྒྱལ་པོའི་གསེར་ཁྲིར་ བསྐོ་བཞག་གནང་སྟེ་ དགོངས་ཞུ་མཛད་ནི་ཨིན་པའི་སྐོར་ལས་ རྒྱལ་ཡོངས་ལུ་ གསུང་བཤད་གནང་མི་དང་འཁྲིལ་ཏེ་ སྤྱི་ལོ་ ༢༠༠༦ ལུ་ བཀའ་ཤོག་གནང་ཐོག་ལས་ སྔོན་འགྲོའི་རྟེན་འབྲེལ་དང་བཅསཔ་སྦེ་ འབྲུག་གི་རྒྱལ་རབས་ལྔ་པའི་ གསེར་ཁྲིར་མངའ་གསོལ་ཞུ་ཡི།

འབྲུག་བརྒྱུད་འཛིན་གྱི་ རྒྱལ་རབས་ལྔ་པའི་ ཁྲི་སྟོན་དངོས་གཞི་འདི་ སྤྱི་ལོ་ ༢༠༠༨ སྤྱི་ཟླ་ ༡༡ པའི་ཚེས་ ༡ ལུ་ སྤུངས་ཐང་བདེ་བ་ཆེན་པོའི་ཕོ་བྲང་ནང་ ཞབས་དྲུང་མ་ཆེན་རིན་པོ་ཆེའི་ སྐུ་མདུན་ལས་ དར་མཛོད་སྣེ་ལྔ་བཞེས་པའི་ཤུལ་ལུ་ ཆིབས་གྲལ་བཙར་ཏེ་ ཀུན་རྭའི་ནང་ གདན་འདྲེན་ཞུ་ཞིནམ་ལས་ སྐྱབས་རྗེ་རྗེ་མཁན་རིན་པོ་ཆེ་ སྤྲུལ་སྐུ་འཇིགས་མེད་ཆོས་གྲགས་མཆོག་གིས་ སྐུ་གསུང་ཐུགས་རྟེན་གྱིས་གཙོས་པའི་ བཀྲ་ཤིས་རྟགས་བརྒྱད་དང་ བཀྲ་ཤིས་རྫས་བརྒྱད་ལ་སོགས་པ་ཚུ་ ཕུལ་གནང་སྟེ་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་རྒྱས་པར་མཛད་ནུག།

སྤྱི་ཟླ་ ༡༡ པའི་ཚེས་ ༣ ལུ་ བཀྲ་ཤིས་ཆོས་རྫོང་གི་ གསེར་ཁྲི་ཁང་བཟང་དང་ ཀུན་རྭའི་ནང་སྦེ་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་རྒྱས་པ་དང་ དེ་ལས་ སྤྱི་ཟླ་ ༡༡ པའི་ཚེས་ ༤ ལས་ ༦ ཚུན་ ཉིན་གྲངས་ ༣ གྱི་རིང་ལུ་ ཅང་གླིང་མའི་ཐང་ནང་ མི་སེར་ཚུ་དང་གཅིག་ཁར་ དགའ་སྟོན་རྟེན་འབྲེལ་མཛད་དེ་ ཕྱི་རྒྱལ་ཁག་གི་ སྐུ་མགྲོན་ཚུ་གིས་གཙོས་པའི་ མི་སེར་ཚུ་ག་ར་ གླུ་གར་དང་ རྩེད་རིགས་སྣ་ཚོགས་ཀྱིས་ ཚིམས་པར་མཛད་གནང་ཡི།

མི་སེར་གྱི་མཐའ་དོན།

མི་དབང་མཆོག་ གསེར་ཁྲིར་ཕེབས་ཞིནམ་ལས་ཚུར་ ཉིན་མཚན་མེད་པར་ མི་སེར་གྱི་ སྐྱིད་སྡུག་དང་ དཔལ་འབྱོར་ཡར་རྒྱས་ཀྱི་དོན་ལུ་ ཐུགས་བཞེད་གནང་པ་གིས་མ་ཚད་པར་ གྲོང་གཡུས་ཁག་སོ་སོར་ སྐུ་དངོས་སུ་ ཆིབས་སྐྱོད་གནང་སྟེ་ མི་སེར་གྱི་ སྐྱིད་སྡུག་ཚུ་ གཟིགས་བཞིན་དུ་ཡོད་པའི་གུ་ ལུང་ཕྱོགས་སོ་སོར་ རྒྱལ་གཟིམ་ཡིག་ཚང་ཚུ་ཡང་ གསར་བཙུགས་གནང་སྟེ་ མི་སེར་ཚུ་ བདེ་སྐྱིད་ཀྱི་དཔལ་ལུ་ ལོངས་སྤྱོད་བཞིན་དུ་ཡོདཔ་ཨིན།

འབྲུག་གི་རྩ་ཁྲིམས་ཆེན་མོ།

སྤྱི་ལོ་ ༢༠༠༨ སྤྱི་ཟླ་ ༡༡ པའི་ ཚེས་ ༡༡ ལུ་ མི་དབང་འབྲུག་རྒྱལ་བཞི་པ་མཆོག་གི་ འཁྲུངས་སྐར་དུས་སྟོན་དང་འཁྲིལ་ཏེ་ བཀྲ་ཤིས་ཆོས་རྫོང་གི་ ཀུན་རྭའི་ནང་སྦེ་ བཞུགས་གྲལ་ཕུན་སུམ་ཚོགས་པའི་སྒོ་ལས་ རྒྱལ་རབས་ཅན་གྱི་ དམངས་གཙོའི་རིང་ལུགས་ཀྱི་ འབྲུག་གི་རྩ་ཁྲིམས་ཆེན་མོ་ གསེར་གྱི་གླེགས་བམ་གུ་ གསེར་ཞུན་གྱི་ ཕྱག་རྟགས་བཟང་པོ་ བཀོད་གནང་སྟེ་ དམངས་གཙོའི་གཞི་འགྱམ་ ལེགས་ཤོམ་སྦེ་ གསར་བཙུགས་མཛད་གནང་ཡི།

རྒྱལ་བཙུན་བཀྲ་ཤིས་མངའ་གསོལ།

མི་དབང་མཆོག་ དགུང་ལོ་ ༣༡ སྤྱི་ལོ་ ༢༠༡༡ སྤྱི་ཟླ་ ༡༠ པའི་ ཚེས་ ༡༣ ལུ་ གཟའ་སྐར་ཕུན་སུམ་ཚོགས་པའི་ཉིན་མར་ ཨ་ཞེ་རྗེ་བཙུན་པདྨ་མཆོག་ རྒྱལ་པོའི་བཙུནམ་སྦེ་ ཁབ་ཏུ་བཞེས་ཡོདཔ་ད་ དེ་ཡང་ མི་དབང་འབྲུག་རྒྱལ་བཞི་པ་མཆོག་གིས་ ཨ་ཞེ་རྗེ་བཙུན་པདྨ་མཆོག་ལུ་ བཀྲ་ཤིས་ཁ་དར་སྣེ་ལྔ་ བཏགས་གནང་པའི་ཤུལ་ལས་ ཀུན་རྭའི་ནང་སྦེ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ བཀྲ་ཤིས་རྫས་བརྒྱད་ལ་སོགས་པ་ཚུ་ ཕུལ་གནང་སྟེ་ བཞུགས་གྲལ་ཕུན་སུམ་ཚོགས་པའི་སྒོ་ལས་ རྒྱལ་བཙུན་བཀྲིས་མངའ་གསོལ་གྱི་ རྟེན་འབྲེལ་ཕུན་སུམ་ཚོགས་པ་ མཛད་གནང་ཡོདཔ་ཨིན།

འཛམ་གླིང་རྒྱལ་སྤྱི་དང་མཐུན་འབྲེལ།

མི་དབང་མཆོག་ མཐུན་བཤེས་རྒྱལ་ཁབ་ རྒྱ་གར་གྱིས་གཙོས་པའི་ མཐུན་འབྲེལ་ཅན་གྱི་ འཛམ་གླིང་རྒྱལ་ཁབ་ཚུ་ནང་ ཆིབས་བསྐྱོད་གནང་སྟེ་ སྔར་ཡོད་མཐུན་ལམ་ཚུ་ རྒྱ་བསྐྱེད་དང་ དམ་ཟབ་མཛད་གནང་པའི་ཁར། སྔར་མེད་མཐུན་འབྲེལ་ཚུ་ཡང་ གསར་བཏོད་མཛད་བཞིན་དུ་ སྐོབས་ཚུད་ཀྱི་ འབྲུག་རྒྱལ་ཁབ་ཆུང་ཀུ་འདི་ འཛམ་གླིང་ནང་ ཡོངས་གྲགས་ཅན་ཅིག་ལུ་ གནས་ཏེ་ཡོདཔ་ཨིནམ་ མི་མང་ག་ར་གིས་ མཁྱེན་གསལ་ལྟར་དུ་ཨིན།

འབྲུག་གི་ལྷ་མི་སྲིད་སྡེའི་ བསོད་ནམས་ཀྱི་ བགོ་སྐལ་ལུ་བྱོན་པའི་ བྱང་ཆུབ་སེམས་དཔའི་རྣམ་སྤྲུལ་ མི་དབང་མངའ་བདག་རིན་པོ་ཆེ་མཆོག་ སྨན་ལྗོངས་སྐྱེ་འགྲོ་ཡོངས་ཀྱི་ སྐྱིད་སྡུག་གཟིགས་བཞིན་དུ་ སྐུ་ཚེ་ཞབས་པད་བསྐལ་བརྒྱར་བརྟན་པའི་ བཀྲ་ཤིས་སྨོན་ལམ་ ཞུ་ནི་ཨིན།