མི་དབང་རྒྱལ་ཡུམ་མཆོག་ལུ་ མི་རློབས་མ་དངུལ་གྱིས་ གཟེངས་བསྟོད་རྟགས་མ།

སྤྱི་ཟླ་ ༣ པའི་ཚེས་ ༨ ལུ་ རྒྱལ་སྤྱི་ཨམ་སྲུའི་ཉིནམ་ བརྩི་སྲུང་དང་འབྲེལ་ཏེ་ མི་དབང་རྒྱལ་ཡུམ་ སངས་རྒྱས་ཆོས་སྒྲོན་དབང་ཕྱུག་མཆོག་གིས་ མི་ལོ་ ༢༥ གི་རིང་ལུ་ འཛམ་གླིང་སྤྱི་ཚོགས་ མི་རློབས་མ་དངུལ་གྱི་ ལེགས་སྨོན་སྐུ་ཚབ་སྦེ་ ཕྱག་ལཱ་མཛད་གནང་པའི་ ངོས་ལེན་ལུ་ འཛམ་གླིང་སྤྱི་ཚོགས་ མི་རློབས་མ་དངུལ་གྱི་ཧོངས་ལས་ གཟེངས་བསྟོད་རྟགས་མ་ཅིག་ཕུལ་ནུག།
དེ་ཡང་ མི་དབང་རྒྱལ་ཡུམ་མཆོག་གིས་ སྤྱི་ལོ་ ༡༩༩༩ ལས་ཚུར་ སྐྱེས་མའི་འཕྲོད་བསྟེན་དང་ བཟའ་ཚང་འཆར་གཞི་ དེ་ལས་ ཕོ་མོའི་ཁྱད་ཆོས་དང་འབྲེལ་བའི་ རྩུབ་སྤྱོད་བཀག་ཐབས་ཚུ་ ཡར་འཕེལ་གཏང་ནིའི་ནང་ ཕྱག་འགན་བསྣམས་ཡོདཔ་ཨིན་པས།
དེ་མ་ཚད་ ན་གཞོན་ལྕོགས་གྲུབ་གོང་འཕེལ་དང་ ཚད་ལྡན་གྲོས་སྟོན་གྱི་ལས་དོན་ གཞི་བཙུགས་ཚུ་གི་སྒོ་ལས་ འབྲུག་པའི་ཨམ་སྲུ་ཚུ་གིས་ བསམ་འཆར་བཤད་དོན་ཚུ་ ས་གནས་ནང་འཁོད་དང་ རྒྱལ་སྤྱིའི་གནས་རིམ་ནང་ ངོས་ལེན་ཡོདཔ་ བཟོ་གནང་ནུག།
གཟེངས་བསྟོད་རྟགས་མ་དེ་ཕུལ་བའི་ རྟེན་འབྲེལ་སྐབས་ལུ་ མི་དབང་རྒྱལ་ཡུམ་མཆོག་གིས་ རྒྱལ་ཡོངས་ཨ་ལོ་དང་ ཨམ་སྲུའི་ལྷན་ཚོགས་ཀྱིས་ འཛམ་གླིང་སྤྱི་ཚོགས་ མི་རློབས་མ་དངུལ་དང་ འཛམ་གླིང་སྤྱི་ཚོགས་ གོང་འཕེལ་ལས་རིམ་ དེ་ལས་ འཛམ་གླིང་སྤྱི་ཚོགས་ ཨ་ལོའི་མ་དངུལ་ཚུ་དང་ མཉམ་འབྲེལ་ཐོག་ལས་ གོང་འཕེལ་བཏང་མི་ ཕོ་མོའི་ཁྱད་ཆོས་ལུ་བརྟེན་པའི་ རྩུབ་སྤྱོད་རྩ་མེད་ཀྱི་ རྒྱལ་ཡོངས་ཐབས་བྱུས་ ༢༠༢༤-༢༠༢༥ ཅན་མ་ཡང་ འགོ་འབྱེད་མཛད་གནང་ཡོདཔ་ཨིན་པས།
དེ་བཟུམ་སྦེ་ མི་དབང་རྒྱལ་ཡུམ་མཆོག་གི་ བརྩོན་ཤུགས་ཚུ་ལུ་ གུས་བཏུད་ཀྱི་དོན་ལས་ སྤ་རོ་ཤེས་རིག་མཐོ་རིམ་སློབ་གྲྭ་གིས་ ཕོ་མོའི་ཁྱད་ཆོས་དང་འབྲེལ་བའི་ ཤེས་ཡོན་ཡོངས་རྫོགས་ཀྱི་ དཔར་རིས་ཅན་གྱི་ དཔེ་དེབ་དེ་ཡང་ འགོ་འབྱེད་མཛད་གནང་ཡོད་པའི་གནས་ཚུལ།

Please follow and like us: