འཛམ་གླིང་དགའ་སྐྱིད་སྙན་ཞུའི་ནང་ ཕིན་ལེན་དེ་ དགའ་སྐྱིད་ཀྱི་ བརྡ་སྟོན་གནས་ཚད་ ཨང་དང་པ་ཐོན་ཡོདཔ།

ཨཱལ་ཇ་ཟི་ར།
འཛམ་གླིང་དགའ་སྐྱིད་སྙན་ཞུ་ ༢༠༢༥ ཅན་མའི་ནང་ བཀོད་དོ་བཟུམ་འབད་བ་ཅིན་ སྲིད་དོན་དང་ མི་སྡེའི་འབྲེལ་ཟིང་ལུ་བརྟེན་ཏེ་ ཡུ་ཨེཛ་གི་ དགའ་སྐྱིད་བརྡ་སྟོན་གནས་ཚད་དེ་ མར་ཉམས་ཡོདཔ་ལས་ ཕིན་ལེན་དང་ ནོར་ཌིག་ལུང་ཕྱོགས་ཀྱི་ རྒྱལ་ཁབ་ཚུ་ གནས་ཚད་མཐོ་ཤོས་ནང་ ཚུད་དེ་ཡོདཔ་ཨིན་པས།
དེ་ཡང་ སྤྱི་ཟླ་ ༣ པའི་ཚེས་ ༢༠ ལུ་ ཨོགཛ་ཕོརཌ་གཙུག་ལག་སློབ་སྡེའི་ དལ་ཉམས་ཞིབ་འཚོལ་ལྟེ་བ་གིས་ ག་ལུབ་དང་ འཛམ་གླིང་སྤྱི་ཚོགས་ ཡུན་བརྟན་གོང་འཕེལ་ ཡོངས་འབྲེལ་དང་གཅིག་ཁར་ མཉམ་འབྲེལ་ཐོག་ལས་ སྙན་ཞུ་དཔར་བསྐྲུན་འབད་མི་དེ་གིས་ འཕྲོད་བསྟེན་དང་ དལ་དབང་ སྦྱིན་གཏོང་གི་གནས་ཚད་ ངན་ལྷད་ལ་སོགས་པའི་ ཁྱད་ཆོས་ཚུ་དང་འབྲེལ་ཏེ་ སྤྱིར་བཏང་གི་ དགའ་སྐྱིད་ཚད་འཇལ་འབད་དོ་ཡོདཔ་ད་ དེ་ཡང་ བརྡ་དོན་ཚུ་ རང་སོའི་བརྟག་དཔྱད་ཚུ་ལུ་ གཞི་བརྟེན་ཏེ་ འཛམ་གླིང་རྒྱལ་ཁབ་ ༡༤༧ ལས་ བསྡུ་ལེན་འབད་ནུག།
དུས་ཅི་གི་ལོ་ནང་ ཨང་དང་པ་དེ་ འཕྲོ་མཐུད་དེ་ར་ ཕིན་ལེན་ཐོན་ཡོདཔ་ད་ དེ་གི་འོག་ལས་ར་ ཌེན་མཱག་དང་ ཨ་ཡིཛ་ལེན་ སུའི་ཌེན་ ནེ་དར་ལེན་ ཀོཛ་ཊ་རི་ཀ་ ནོར་ཝེ་ ཨིཛ་རེལ་ ལག་ཟེམ་བཱག་ མེག་སི་ཀོ་ཚུ་ དགའ་སྐྱིད་ཀྱི་ བརྡ་སྟོན་གནས་ཚད་ མཐོ་ཤོས་ནང་ ཚུད་དེ་ཡོདཔ་ཨིན་པས།
དེ་ལས་ བརྡ་སྟོན་གནས་ཚད་ དམའ་ཤོས་ནང་ ཨཱཕ་གྷ་ནིཛ་ཏཱན་ ཐོན་ཡོདཔ་ད་ དེ་གི་འོག་ལས་ར་ སི་ཡ་ར་ལི་ཡོན་ ལེ་བ་ནོན་ མ་ལ་ཝི་ ཟིམ་བབ་ཝེ་ བོཊཛ་ཝ་ན་ ཀོང་གོ་ ཡེ་མེན་ ཀོ་མོ་རོཛ་ ལེ་སོ་ཐོ་ རྒྱལ་ཁབ་ཚུ་ཐོན་ནུག།
ཡུ་ཨེཛ་གི་ དགའ་སྐྱིད་བརྡ་སྟོན་གནས་ཚད་དེ་ འདས་པའི་ལོ་དང་ཕྱདཔ་ད་ མར་ཉམས་ཏེ་ ཨང་ ༢༤ ལུ་ གནས་ཡོདཔ་ད་ དེ་ཡང་ སྤྱི་ལོ་ ༢༠༡༢ ལོར་ ཨང་ ༡༡ པར་ གནས་ཡོད་ས་ལས་ མར་ཉམས་ཏེ་ར་ འགྱོཝ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: