མི་དབང་མངའ་བདག་རིན་པོ་ཆེ་མཆོག་གིས་ ད་ཏོ་ཨ་ཌམ་ ཧུ་ཊུན་ལུ་ བདེ་སྲུང་གསེར་གྱི་རྟགས་མ།

སྤྱི་ཟླ་ ༤ པའི་ཚེས་ ༢༣ ལུ་ མི་དབང་མངའ་བདག་རིན་པོ་ཆེ་མཆོག་གིས་ ད་ཏོ་ཨ་ཌམ་ ཧུ་ཊུན་གྱིས་ མི་ཡན་མར་ རྒྱལ་ཁབ་ནང་ སྤྱི་ཟླ་ ༣ པའི་ཚེས་ ༢༨ ལུ་ ས་ཡོམ་ཚབས་ཆེན་རྐྱབ་པའི་ཤུལ་ལས་ འབྲུག་ལས་ གྲོགས་རམ་གྱི་དོན་ལུ་ བཏང་གནང་མི་ འབྲུག་གི་སྨན་བཅོས་གྲོགས་རམ་སྡེ་ཚན་ལུ་ ཁྱད་དུ་འཕགས་པའི་ རྒྱབ་སྐྱོར་འབད་ཡོད་པའི་ ངོས་འཛིན་ཐོག་ལུ་ ཁས་བླངས་ཀྱི་དོན་ལས་ འབྲུག་གི་གཟེངས་རྟགས་མཐོ་ཤོས་ཨིན་མི་ བདེ་སྲུང་གསེར་གྱི་རྟགས་མ་ གནང་ཡོདཔ་ཨིན་པས།

འཐུས་མི་ ༨༧ འབད་མི་ འབྲུག་གི་སྡེ་ཚན་གྱིས་ རྐྱེན་ངན་གྱི་ ས་ཁོངས་ནང་ གནད་འགག་ཆེ་བའི་ སྨན་བཅོས་གྲོགས་རམ་ཚུ་ དོན་སྨིན་ཅན་སྦེ་ ལག་ལེན་འཐབ་ཚུགསཔ་ བཟོ་ནིའི་ནང་ ད་ཏོ་ཨ་ཌམ་ ཧུ་ཊུན་གྱིས་ བྱམས་བརྩེའི་སྒོ་ལས་ གྲོགས་རམ་ཚུ་ དུས་ཚོད་ཁར་འབད་ནུག།

གཟེངས་རྟགས་དེ་ཡང་ ཁོ་གི་ཁྱད་དུ་འཕགས་པའི་ ཞབས་ཏོག་དང་ འབྲུག་དང་ མི་ཡན་མར་གྱི་བར་ན་ མཐུན་ལམ་བཙན་ཐབས་ལུ་ ཁྱད་དུ་འཕགས་པའི་  ལྷན་ཐབས་འབད་མི་ལུ་ ངོས་འཛིན་གྱི་དོན་ལས་ གནང་ཡོདཔ་ཨིན་པས།

དེམ་ཚད་ མི་དབང་མངའ་བདག་རིན་པོ་ཆེ་མཆོག་གིས་ འབྲུག་གི་སྨན་བཅོས་གྲོགས་རམ་སྡེ་ཚན་དང་ཡང་ མཇལ་ཕྲད་མཛད་གནང་ཡོད་པའི་གནས་ཚུལ།