པཱ་ཀིཛ་ཏཱན་གྱིས་ རྒྱ་གར་གྱི་ གནམ་གྲུ་ཚུ་གི་དོན་ལུ་ མཁའ་དབྱིངས་ས་ཁོངས་ཚུ་བཀག་དམ།

རོའི་ཊརཛ།
སྤྱི་ཟླ་ ༤ པའི་ཚེས་ ༢༤ ལས་ པཱ་ཀིཛ་ཏཱན་གྱིས་ རྒྱ་གར་གྱི་ གནམ་གྲུ་ཚུ་གི་དོན་ལུ་ མཁའ་དབྱིངས་ས་ཁོངས་ཚུ་ བཀག་དམ་འབད་ཡོདཔ་ད་ དེ་ཡང་ སྤྱི་ཟླ་ ༤ པའི་ཚེས་ ༢༣ ལུ་ རྒྱ་གར་གྱི་ ཀཤ་མིར་མངའ་སྡེའི་ནང་ བལྟ་བཤལཔ་ཚུ་ལུ་ ཨིཛ་ལ་མིག་ གཡིབ་དམག་ཚུ་གིས་ གནོད་འཚུབ་བཀལ་ནི་དེ་གིས་ཨིན་པས།
དེ་མ་ཚད་ རྒྱ་གར་གྱིས་ ཆུ་བགོ་བཤའི་ ཆིངས་ཡིག་གལ་ཅན་ཅིག་ མཚམས་འཇོག་འབད་མི་ལུ་ཡང་ ངོས་ལེན་འབད་མ་བཏུབ་པར་ཡོདཔ་ད་ དམག་ལན་ཐེངས་ ༣ རྐྱབ་པའི་ཁར་ རྡུལ་ཕྲན་མཚོན་ཆ་ཡོད་མི་ ཁྱིམ་ཚང་རྒྱལ་ཁབ་ ༢ ཀྱི་བར་ན་ མཐུན་ལམ་གྱི་ གནས་སྟངས་དེ་ཡང་ དམའ་ཤོས་ཅིག་ལུ་ལྷོད་ནུག།
སྤྱི་ལོ་ ༢༠༠༨ ལོར་ མུམ་བཱའི་ལུ་ རྒྱ་གར་གྱི་ མི་སེར་ཚུ་ལུ་ གནོདཔ་བཀལ་བའི་ཤུལ་ལས་ ཀཤ་མིར་མངའ་སྡེའི་ནང་ ཡོངས་གྲགས་ཅན་གྱི་ བལྟ་བཤལ་ས་ཁོངས་དེ་ཁར་ ཕོ་སྐྱེས་ ༢༦ དམར་བསད་འབད་ནི་དེ་གིས་ཡང་ ཕྱི་འབྲེལ་དོན་གཅོད་ལུ་ དཀའ་ངལ་བྱུང་ཡོདཔ་ཨིན་པས།
ད་རེས་ ཀཤ་མིར་མངའ་སྡེའི་ནང་ གནོད་འཚུབ་བཀལཝ་ལས་ རྒྱ་གར་གྱིས་ རྒྱལ་ཁབ་ ༢ ཀྱི་ ས་མཚམས་སྒོ་ར་ཚུ་ བཀག་དམ་འབད་བའི་ཁར་ སྤྱི་ལོ་ ༡༩༦༠ ལུ་བཟོ་མི་ ཨིན་ཌུཛ་གཙང་ཆུ་ བགོ་བཤའི་ཆིངས་ཡིག་དེ་ཡང་ མཚམས་འཇོག་འབད་ནུག།
རྒྱ་གར་གྱི་ ཁྲིམས་སྲུང་འགག་སྡེ་གིས་ དོགས་པ་ཅན་ ༣ ངོས་འཛིན་འབད་མིའི་གྲས་ལས་ མི་ངོམ་ ༢ པཱ་ཀིཛ་ཏཱན་གྱི་ མི་ཁུངས་ཨིནམ་སྦེ་ གསལ་བསྒྲགས་འབད་ཡོད་རུང་ ནིའུ་ལྡི་ལིའི་ ཁ་ཐུག་ལས་ ཁ་གསལ་ཅིག་ ག་ནི་ཡང་ བཤད་མ་བཏུབ་ཨིན་པས།
མུཛ་ལིམ་མང་ཤོས་ཡོད་མི་ ཀཤ་མིར་ལུང་ཕྱོགས་དེ་ རྒྱ་གར་དང་ པཱ་ཀིཛ་ཏཱན་གྱི་བར་ན་ མ་འགྲིགསཔ་ཐལ་མི་ ས་ཁོངས་ཅིག་ཨིནམ་ད་ ལུང་ཕྱོགས་དེ་ལུ་ རྒྱལ་ཁབ་གཉིས་ཆ་ར་གིས་ ཐོབ་བརྗོད་བཀོདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: