མི་དབང་མངའ་བདག་རིན་པོ་ཆེ་མཆོག་གིས་ རྒྱ་གར་དམག་སྡེའི་ གཙོ་འཛིན་དང་མཇལ་ཕྲད།

སྤྱི་ཟླ་ ༧ པའི་ཚེས་ ༡ ལུ་ མི་དབང་མངའ་བདག་རིན་པོ་ཆེ་མཆོག་དང་ མི་དབང་རྒྱལ་བཙུན་མཆོག་གིས་ བཀྲིས་ཆོས་རྫོང་གི་ གསེར་ཁྲི་ཁང་བཟང་ནང་སྦེ་ རྒྱ་གར་དམག་སྡེའི་གཙོ་འཛིན་ དམག་སྤྱི་ཨུ་པེན་ད་ར་ ཌི་ཝེ་ཌི་དང་ མཇལ་ཕྲད་གནང་ནུག། 

དམག་སྤྱི་ཌི་ཝེ་ཌི་དེ་ བཀྲིས་ཆོས་རྫོང་ནང་ ཆིབས་གྲལ་བཙར་ཐོག་ལས་ གདན་འདྲེན་ཞུ་ཡོདཔ་མ་ཚད་ རྡོ་གཅལ་ནང་ ཕེབས་པའི་སྐབས་ལུ་ དབང་ཆེན་བསྟི་སྭོ་ཡང་ འགོ་འདྲེན་འཐབ་ཡོདཔ་ཨིན་པས།

དམག་སྤྱི་ཌི་ཝེ་ཌི་གིས་ འབྲུག་ལུ་ ཉིན་གྲངས་ ༤ གི་རིང་ལུ་ གཟིགས་སྐོར་གནང་ཡོདཔ་ད་ གཟིགས་སྐོར་དེ་གིས་ རྒྱ་འབྲུག་ ༢ ཀྱི་བར་ན་ ཡུན་བརྟན་ཅན་གྱི་ མཐུན་ལམ་སྒྲིང་སྒྲིང་ཡོད་པའི་ བརྡ་མཚོན་སྟོནམ་ཨིན་པའི་ གནས་ཚུལ་མདོར་བསྡུས།