རྒྱལ་ཡོངས་ཚོགས་སྡེའི་ ཚོགས་ཐེངས་ ༣༥ པ་ མཇུག་བསྡུའི་རྟེན་འབྲེལ།

པདྨ་དབང་འདུས།

རྒྱལ་ཡོངས་ཚོགས་སྡེའི་ ཚོགས་ཐེངས་ ༣༥ པ་དེ་ སྤྱི་ཟླ་ ༧ པའི་ཚེས་ ༤ ལུ་ མི་དབང་མངའ་བདག་རིན་པོ་ཆེ་མཆོག་ལུ་ བཀྲིས་སྨོན་ལམ་ཕུལ་ཐོག་ལས་ གྲོལ་གནང་ནུག།

དེ་བསྒང་ རྒྱལ་ཡོངས་ཚོགས་སྡེའི་ཁྲི་འཛིན་ སངས་རྒྱས་རྡོ་རྗེ་གིས་ མི་དབང་མངའ་བདག་རིན་པོ་ཆེ་མཆོག་གིས་ འབྲུག་མིའི་ཞི་བདེ་དང་ ལོངས་སྤྱོད་ཀྱི་དོན་ལས་ འགྱུར་ལྡོག་མེད་པའི་ བརྩོན་ཤུགས་བསྐྱེད་གནང་མི་ལུ་ བསམ་བརྗོད་ལས་འདས་པའི་ བཀའ་དྲིན་དགའ་ཚོར་ ཞུ་བའི་ཁར་ ཅི་བ་འཕྲུལ་རིག་སྤེལ་ཁང་ལས་ རྒྱལ་སྤྱིའི་གནས་རིམ་ནང་ མཁྱེན་གཟིགས་ཆེ་བའི་ དབུ་ཁྲིད་ཀྱི་ ངོས་ལེན་ལུ་ མཁས་དབང་གི་གཟེངས་རྟགས་ ཕུལ་ཡོད་མི་ལུ་ཡང་ ཧིང་གི་དཀྱིལ་ལས་ར་ བཀྲིས་བདེ་ལེགས་ཕུལཝ་ཨིན་ཟེར་ ཞུ་ཡོདཔ་ཨིན་པས།

དེ་བཟུམ་སྦེ་ ཨཱ་མེ་ད་བཱད་ལུ་ རྒྱ་གར་གྱི་གནམ་གྲུ་ ཐུག་རྐྱེན་ནང་ ཤི་རྐྱེན་བྱུང་མི་ཚུ་གི་དོན་ལས་ བཀྲིས་ཆོས་རྫོང་གི་ ཀུན་ར་ནང་སྦེ་ སྨོན་ལམ་ཚུ་ འགོ་འདྲེན་འཐབ་གནང་མི་ལུ་ཡང་ ཧིང་ལས་ར་ བཀྲིན་ཆེ་ཟེར་ ཞུ་བའི་ཁར་ མི་དབང་མངའ་བདག་རིན་པོ་ཆེ་མཆོག་གིས་ འཕྲལ་ཁམས་ཅིག་ཁར་ སུའི་ཌེན་ལུ་ ཆིབས་བསྐྱོད་གནང་ཡོད་མི་དང་ རྒྱལ་པོའི་ཞིང་བརྡ་དོན་འཕྲུལ་རིག་མཐོ་རིམ་སློབ་གྲྭའི་ནང་ འཕྲུལ་རིག་གསར་བཏོད་འགྲེམ་སྟོན་ རྒྱལ་འཛིན་གཙུག་ལག་སློབ་སྡེའི་ མཐོ་རིམ་ཤེས་ཡོན་གྱི་ མཐར་འཁྱོལ་མཛད་སྒོ་ཚུ་ནང་ བྱོན་གནང་མི་ལུ་ཡང་ བཀྲིན་དགའ་ཚོར་ཡོད་ལུགས་ཞུ་ནུག།

མཐའ་ཡས་ལེན་གྱི་ སྡེ་ཚན་ཅིག་གིས་ མི་དབང་མངའ་བདག་རིན་པོ་ཆེ་མཆོག་དང་ མི་དབང་རྒྱལ་བཙུན་མཆོག་ལུ་ སྒྲ་སྐདཐོག་གི་ བཀའ་འགྱུར་ཊི་པི་ཏ་ཀ་ ཕུལ་མི་དེ་གིས་ འབྲུག་དང་ མཐའ་ཡས་ལེན་གྱི་བར་ན་ ཆོས་དོན་གྱི་འབྲེལ་བ་ གཏིང་ཟབ་ཡོད་པའི་ བརྡ་མཚོན་སྟོནམ་ལས་ ངལ་རངས་ཡོད་ལུགས་དང་ སྐྱབས་རྗེ་རྗེ་མཁན་རིན་པོ་ཆེ་ལུ་ རྒྱལ་ཁམས་བདེ་སྐྱིད་ཀྱི་དོན་ལས་ ཞི་བདེའི་སྨོན་ལམ་ཚུ་ ཚོགས་གནང་མི་ལུ་ཡང་ བཀྲིན་ཆེ་ལུགས་ཚུ་ ཞུ་ཡོདཔ་ཨིན་པས།

མི་རྗེ་ཁྲི་འཛིན་གྱིས་ ད་རེས་ཀྱི་ ཚོགས་ཐེངས་ནང བསྐྱར་ཞིབ་སྙན་ཞུ་ཁག་ ༤ དང་ ཏི་རུའི་དཔྱད་ཡིག་ ༤ དེ་ལས་ མི་རྗེ་བློན་ཆེན་གྱི་གཙོས་པའི་ བློན་པོ་ཚུ་དང་གཅིག་ཁར་ དྲི་བཀོད་ལས་རིམ་ཁག་ ༤ འགོ་འདྲེན་འཐབ་ཡོད་མི་ཚུ་གི་ བཅུད་བསྡུས་ཅིག་ཡང་ གསལ་བཤད་གནང་ནུག།

མཇུག་བསྡུའི་རྟེན་འབྲེལ་ནང་ མི་རྗེ་བློན་ཆེན་དང་ ཚོགས་དཔོན་ ལྷན་རྒྱས་གཞུང་ཚོགས་ཀྱི་ བློན་པོ་ཚུ་གིས་གཙོས་པའི་ ཆེ་མཐོའི་དཔོན་ཁག་ཚུ་གིས་ གྲལ་གཏོགས་མཛད་ཡོད་པའི་གནས་ཚུལ།