རྒྱ་པཱན་གྱིས་ རྒྱལ་གཞུང་འབྲུག་གི་དགག་སྡེ་ལུ་ མེ་རྐྱེན་ཉེན་སྲུང་སྣུམ་འཁོར་ ༥ ཞལ་འདེབས་སྦེ་བྱིན་ཡོདཔ།

པདྨ་དབང་འདུས།

འབྲུག་དང་ རྒྱ་པཱན་གྱི་བར་ན་ མཐུན་ལམ་འཕྲོ་མཐུད་ཡོད་པའི་ བརྡ་མཚོན་ལུ་ འབྲུག་ནུབ་ཕྱོགས་ཀྱི་དོན་ལས་ བསྐྱར་བཅོས་ཐོག་གི་ མེ་རྐྱེན་ཉེན་སྲུང་སྣུམ་འཁོར་ལས་འགུལ་འོག་ལས་ རྒྱ་པཱན་གཞུང་གིས་ རྒྱལ་གཞུང་འབྲུག་གི་དགག་སྡེ་ལུ་ མཁོ་བྱད་ཀུན་ཚང་གི་ མེ་རྐྱེན་ཉེན་སྲུང་སྣུམ་འཁོར་ ༥ ཞལ་འདེབས་སྦེ་བྱིན་ནུག། 

དེ་ཡང་ སྤྱི་ཟླ་ ༧ པའི་ཚེས་ ༡༧ ལུ་ སྣུམ་འཁོར་ཚུ་ རྩིས་སྤྲོད་ལེན་སྐབས་ལུ་ འབྲུག་ལུ་ རྒྱ་པཱན་གཞུང་ཚབ་ ཀེ་ཨི་ཅི་ཨོ་ནོ་དང་ རྒྱལ་གཞུང་དགག་སྡེའི་གཙོ་འཛིན་ གུང་བློན་འོགམ་ འཆི་མེད་རྡོ་རྗེ་ཚུ་ བྱོན་ཡོདཔ་ཨིན་པས།

ད་རེས་ཀྱི་ སྣུམ་འཁོར་ཚུ་བརྩིས་ཏེ་ རྒྱ་པཱན་ལས་ ད་ཚུན་གྱི་བར་ན་ འབྲུག་ལུ་ མེ་རྐྱེན་ཉེན་སྲུང་སྣུམ་འཁོར་བསྡོམས་ ༣༩ བྱིན་ཡོད་མི་ལུ་ བསྐྱར་བཅོས་དང་ སྐྱེལ་འདྲེན་ཚུ་བསྡོམས་ཏེ་ ཡུ་ཨེཛ་ཌོ་ལར་ ༢༣༡.༢༣༥ འབདཝ་ད་ དངུལ་ཀྲམ་ས་ཡ་ ༡༩,༡༩.༥༥༣ དེ་ཅིག་གནས་ནུག།

སྣུམ་འཁོར་ཚུ་ཡང་ འབྲུག་ནུབ་ཕྱོགས་ཀྱི་ མེ་རྐྱེན་ཉེན་སྲུང་དང་ གློ་བུར་གདོང་ལན་གྱི་ ལྕོགས་གྲུབ་ཡར་དྲག་དོན་ལས་ ཐིམ་ཕུ་དང་ སྤ་རོ་ སྤུ་ན་ཁ་ཚུ་ནང་ བཞག་ནི་ཨིན་པས།

རྒྱལ་གཞུང་དགག་སྡེའི་ ཁ་ཐུག་ལས་ སྣུམ་འཁོར་ཚུ་ མི་མང་གི་ ཉེན་སྲུང་བཙན་ཐབས་ལུ་དང་ གློ་བུར་གྱི་ རྐྱེན་ངན་སྐབས་ལུ་ གྲ་སྒྲིག་གི་དོན་ལས་ རྒྱ་པཱན་གཞུང་གིས་ ཡུན་རིང་མཉམ་འབྲེལ་དང་ གཏོང་ཕོད་ཅན་གྱི་ ཞལ་འདེབས་གནང་མི་ལུ་ སེམས་ཀྱི་གདིང་ལས་ར་ བཀའ་དྲིན་དགའ་ཚོར་ཡོད་ལུགས་ཚུ་ བཤད་ཡོད་པའི་གནས་ཚུལ།