རྒྱ་ནག་གཞུང་གིས་ ཨ་ལོའི་སྐྱེས་ཚད་ ཡར་སེང་གི་དོན་ལས་ ཨ་ལོའི་ཕམ་ཚུ་ལུ་ མ་དངུལ་གྱི་གྲོགས་རམ།

བི་བི་སི།
རྒྱ་ནག་གཞུང་གིས་ ཨ་ལོའི་སྐྱེས་ཚད་ ཡར་སེང་གི་དོན་ལས་ ལོ་བསྟར་བཞིན་དུ་ སྐྱེས་ལོ ༣ འོག་རྒྱུ་འབད་མི་ ཨ་ལོ་རེ་ལུ་ རྒྱ་ནག་གི་ཏི་རུ་ ཡུན་ ༣,༦༠༠ རེ་འབདཝ་ད་ ཡུ་ཨེཛ་ཌོ་ལཱར་ ༥༠༠ རེ་ གྲོགས་རམ་སྦེ་ འགོ་དང་པ་ བྱིན་དོ་ཡོདཔ་ཨིན་པས།
དེ་ཡང་ ཀམ་མུ་ནིཛ་གཞུང་གིས་ ལོ་ངོ་བཅུ་ཕྲག་ ༡ གི་ཧེ་མར་ རྒྱ་ནག་ལུ་ སྐྱེས་ཚད་མར་ཕབ་ཀྱི་དོན་ལས་ ཨ་ལོ་གཅིག་ཟེར་མི་ རྩོད་རྙོག་ཅན་གྱི་ སྲིད་བྱུས་གཞི་བཙུགས་འབད་མི་དེ་ ད་རེས་ ཆ་མེད་བཏང་ནུག།
གཞུང་འབྲེལ་བརྡ་བརྒྱུད་ནང་ བཀོད་དོ་བཟུམ་འབད་བ་ཅིན་ མ་དངུལ་གྱི་ གྲོགས་རམ་དེ་གིས་ བཟའ་ཚང་ས་ཡ་ ༢༠ དེ་ཅིག་ལུ་ ཨ་ལོ་གསོ་སྐྱོང་གི་དོན་ལས་ ཟད་འགྲོ་ཚུ་ལུ་ ཕན་ཐོགས་ནི་མས་ཟེར་ཨིན་པས།
འཛམ་གླིང་ནང་ དཔལའབྱོར་སྟོབས་ཤུགས་ཅན་གྱི་ རྒྱལ་ཁབ་ཨང་ ༢ པ་ཨིན་མི་ རྒྱ་ནག་ལུ་ མི་འབོར་གྱི་ དཀའ་ངལ་འཐོན་དོ་ཡོད་པ་ལས་ རྒྱ་ནག་གི་ མངའ་སྡེ་ལེ་ཤ་ཅིག་ནང་ དངུལ་ཕོགས་སྤྲོད་དེ་ ཨ་ལོ་ལེ་ཤ་སྦེ་ སྐྱེ་བཅུག་ནི་གི་ ཐབས་ཤེས་ཚུ་ བཏོན་དོ་ཡོདཔ་སྦེ་བཀོད་ནུག།
དེ་བཟུམ་མའི་ སྲིད་བྱུས་དེ་ དུས་ཅི་གི་ ལོ་འགོ་བཙུགས་ཁམས་ཅིག་ཁ་ལས་ ལག་ལེན་འཐབ་ནི་ འགོ་བཙུགས་ཡོདཔ་མ་ཚད་ སྤྱི་ལོ་ ༢༠༢༢ དང་ ༢༠༢༤ གི་བར་ན་ ཨ་ལོ་སྐྱེས་མི་ བཟའ་ཚང་ཚུ་གིས་ཡང་ མ་དངུལ་གྲོགས་རམ་གྱི་དོན་ལུ་ ཞུ་ཡིག་བཙུགས་ཆོགཔ་སྦེ་ བཟོ་ཡོདཔ་ཨིན་མས།
དེ་མ་ཚད་ འདས་པའི་བདུན་ཕྲག་ཚུ་ནང་ རྒྱ་ནག་གཞུང་གིས་ ས་གནས་ཀྱི་ གཞུང་ཚུ་ལུ་ སློབ་གྲྭ་ཁག་གིས་ སྔོན་འགྲོའི་ཤེས་ཡོན་ཚུ་ རིན་མེད་སྟོང་མར་ ལག་ལེན་འཐབ་ནི་གི་ འཆར་གཞི་ཚུ་ཡང་ བཟོ་དགོ་པའི་ ནན་སྐུལ་འབད་ནུག་ཟེར་ བཀོད་འདུག་པའི་གནས་ཚུལ།

Please follow and like us: