ཡུ་ཨེཛ་གིས་ བྱང་ཀོ་རི་ཡའི་ རྒྱལ་ཁབ་དེ་ རྡུལ་ཕྲན་ནུས་ཤུགས་ཀྱི་ རྒྱལ་ཁབ་ཅིག་སྦེ་ ངོས་ལེན་འབད་དགོཔ།

ཨཱལ་ཇ་ཟི་ར།

སྤྱི་ཟླ་ ༧ པའི་ཚེས་ ༢༩ ལུ་ བྱང་ཀོ་རི་ཡའི་སྲིད་འཛིན་ ཀིམ་ཇོང་ཨཱན་གྱི་མོ་སྤུན་ ཀིམ་ཡོ་ཇོང་གིས་ བཤད་དོ་བཟུམ་འབད་བ་ཅིན་ ཡུ་ཨེཛ་གིས་ ཁོང་གི་རྒྱལ་ཁབ་དེ་ སྒྱུར་བཅོས་མ་རུང་བའི་ རྡུལ་ཕྲན་ནུས་ཤུགས་ཀྱི་ རྒྱལ་ཁབ་སྦེ་ ངོས་ལེན་འབད་དགོ་ཟེར་ཨིན་པས།

དེ་ཡང་ ཀོ་རི་ཡའི་ གཞུང་འབྲེལ་གནས་ཚུལ་ལྟེ་བ་གིས་ དཔར་བསྐྲུན་འབད་ཡོད་མིའི་ནང་ མ་འོངས་པ་ལུ་ གནད་དོན་ག་ཅི་དང་འབྲེལ་ཏེ་འབད་རུང་ བྱང་ཀོ་རི་ཡའི་ ལྕོགས་གྲུབ་དང་ སྲིད་འབྲེལ་གྱི་ གནས་སྟངས་ཚུ་ མཐའ་གཅིག་ཏུ་ སྒྱུར་བཅོས་བཏང་ཡོདཔ་སྦེ་བཀོད་ནུག།

བྱང་ཀོ་རི་ཡ་དེ་ རྡུལ་ཕྲན་ནུ་ཤུགས་ཀྱི་ རྒྱལ་ཁབ་ཟེར་བའི་ གནས་ཚད་དེ་ཡང་ རྡུལ་ཕྲན་ནུས་ཤུགས་ལུ་ བཀག་ཆ་ཚབས་ཆེན་གྱི་ གནས་སྟངས་ནང་ གཞི་བཙུགས་འབད་ཡོདཔ་ད་ དེ་ཡང་ མངོན་པར་མཐོ་བའི་ ཁྲིམས་ལུགས་ཀྱི་སྒོ་ལས་ གཞི་བཙུགས་འབད་ཡོདཔ་ལས་ མི་སེར་ག་རའི་ བློ་འདོད་ཀྱི་ བརྡ་མཚོན་སྟོན་དོ་ཡོདཔ་སྦེ་ བཤད་ཡོདཔ་ཨིན་པས།

ཀམ་ཡོ་ཇོང་གིས་ བྱང་ཀོ་རི་ཡ་དང་ ཡུ་ཨེཛ་རྒྱལ་ཁབ་ ༢ གདོང་ཐུག་འབད་དེ་ ཁེ་ཕན་ག་ནི་ཡང་མེདཔ་ལས་ ཡུ་ཨེཛ་གི་ཁ་ཐུག་ལས་ བསམ་མནོ་གསརཔ་གི་ཐོག་ལས་ འབྲེལ་དོན་གྱི་ ཐབས་ལམ་གཞན་ འཚོལ་དགོཔ་སྦེ་བཤད་ནུག།

ད་རེས་ མོ་རའི་ཕོ་སྤུན་ ཀིམ་ཇོང་ཨཱན་དང་ ཡུ་ཨེཛ་གི་ སྲིད་འཛིན་ཊམ་གྱི་བར་ན་ མཐུན་ལམ་དེ་ ནེ་ཚུན་ཚོད་ར་ མ་ལེགསཔ་མེདཔ་ལས་ ཡུ་ཨེཛ་ཁ་ཐུག་ལས་ བྱང་ཀོ་རི་ཡ་དེ་ རྡུལ་ཕྲན་ནུས་ཤུགས་མེད་པའི་ རྒྱལ་ཁབ་ལུ་ སྒྱུར་བཅོས་ཀྱི་དོན་ལས་ སྒེར་དོན་མཐུན་ལམ་ ལག་ལེན་འཐབ་པ་ཅིན་ བྱང་ཀོ་རི་ཡ་ལུ་ བརྙས་བཅོས་འབད་བའི་ཚུལ་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།