བཀྲིས་སྒང་ཡོན་ཕུ་ལ་ལུ་ དམིགས་བསལ་གྱི་ སློབ་གྲྭ་འགོ་འབྱེད།

སྤྱི་ཟླ་ ༧ པའི་ཚེས་ ༢༨ ལུ་ ཤེས་རིག་ལྷན་ཁག་གིས་ བཀྲིས་སྒང་ ཡོན་ཕུ་ལ་ལུ་ སྨྱོ་རྫས་ལག་ལེན་འཐབ་མི་ ན་གཞོན་ཚུ་གི་ ཀུན་སྤྱོད་བསྐྱར་གསོའི་དོན་ལས་ ཡ་རབ་གླིང་འབྲིང་རིམ་སློབ་གྲྭ་ཆེ་བ་ཟེར་ དམིགས་བསལ་གྱི་ སློབ་གྲྭ་ཅིག་ འགོ་འབྱེད་མཛད་ནུག།
སློབ་ཕྲུག་ ༤༢༤ གི་ ཤོང་ཚད་ཡོད་མི་ སློབ་གྲྭ་དེ་ནང་ ད་རེས་ འགོ་དང་པ་ སློབ་རིམ་ ༧ པ་ལས་ ༡༠ པ་ཚུན་གྱི་ སློབ་ཕྲུག་ ༦༣ དང་ སྦྱོང་བརྡར་ཅན་གྱི་ གྲོས་སྟོན་པ་ ༢ བརྩིས་ཏེ་ ལས་གཡོགཔ་ ༣༠ དང་བཅསཔ་སྦེ་ སྤྱི་ཟླ་ ༨ པའི་ བདུན་ཕྲག་ ༢ པའི་ནང་ལས་ གཅེས་སྐྱོང་ལུ་ གཙོ་རིམ་བཟུང་སྟེ་ ཤེས་ཡོན་སློབ་སྟོན་ལས་རིམ་ འགོ་བཙུགས་ནི་ཨིན་པས།
སློབ་གྲྭའི་དབུ་འཛིན་ ཡེ་ཤེས་རྡོ་རྗེ་གིས་ སློབ་གྲྭ་དེ་ནང་ རིག་རྩལ་དང་ སེམས་ཁམས་ གཟུགས་ཁམས་ མི་སྡེ་ དེ་ལས་ ཀུན་སྤྱོད་ཚུ་གི་ ཀུན་ཚང་ཤེས་ཡོན་ཚུ་འབདཝ་ད་ གནད་དོན་ཁག་ ༦ ལུ་ གཙོ་བོར་བཏོན་ཏེ་ སློབ་སྟོན་འབད་ནི་ཨིན་པའི་ ལས་རིམ་ཡོདཔ་སྦེ་བཤད་ནུག།
དེ་ཡང་ དུས་རྒྱུན་གྱི་ སློབ་གྲྭ་ཚུ་བཟུམ་སྦེ་མེན་པར་ གྲོས་སྟོན་དང་ དྲན་ཤེས་སྦྱང་བརྩོན་ སྒྱུ་རྩལ་ ལག་རྩལ་ལས་རིམ་ལ་སོགས་པ་ཚུ་ཡང་ སློབ་སྟོན་འབད་ནི་ཨིན་པས།
གསར་བཏོད་སློབ་གྲྭ་དེ་ཡང་ ན་གཞོན་ཚུ་ སྨྱོ་རྫས་ལོག་སྤྱོད་ཀྱི་ ཚ་གྱང་ཡར་སེང་འགྱོ་བའི་ དཀའ་ངལ་བསལ་ཐབས་ལུ་ གཞུང་གི་ཁ་ཐུག་ལས་ ཡུན་རིང་དང་ བྱམས་བརྩེའི་ཐབས་ལམ་གྱི་ བསྐྱར་གསོའི་བརྩོན་ཤུགས་དང་འཁྲིལ་ཏེ་ གཞི་བཙུགས་འབད་ཡོད་པའི་གནས་ཚུལ།

Please follow and like us: