མི་རྗེ་བློན་ཆེན་མཆོག་གིས་ ཨུ་ཏར་པར་དེཤ་ལུ་གཟིགས་སྐོར།

མི་རྗེ་བློན་ཆེན་མཆོག་ སྤྱི་ཟླ་ ༩ པའི་ཚེས་ ༥ གི་དྲོ་པར་ ཨ་ཡོ་དྷི་ཡ་ གནམ་གྲུ་ཐང་ནང་ ཕེབས་པའི་སྐབས་ལུ་ ཨུ་ཏར་པར་དེཤ་ མངའ་སྡེའི་བློན་པོ་ སུ་རི་ཡ་པར་ཏབ་ ཤ་ཧི་དང་ ཨ་ཡོ་དྷི་ཡའི་ སྤྱི་ཚོགས་འཐུས་མི་ ཝེད་པར་ཀཤ་གུབ་ཏ་ དེ་ལས་ གཞན་ཡང་ མངའ་སྡེའི་ཆེ་མཐོའི་འགོ་དཔོན་ཚུ་གིས་ ཕེབས་བསུ་ཞུ་ཡོདཔ་ཨིན་པས།

དེ་གི་ཤུལ་ལས་ མི་རྗེ་བློན་ཆེན་གྱིས་ ཨ་ཡོ་དྷི་ཡ་ལུ་ ཤྲཱི་རཱམ་ཟེར་ རྒྱལ་པོ་དགའ་བྱེད་ཀྱི་ལྷ་ཁང་ནང་ ཐུགས་སྨོན་ཚུ་གནང་སྟེ་ ཆོས་ཕྱོགས་མཛད་སྒོར་ གྲལ་གཏོགས་མཛད་ནུག།

ལྷ་ཁང་དེ་ཡང་ ཧིན་དུ་ཆོས་ལུགས་ཀྱི་ སྔར་ཁྱུན་ལམ་སྲོལ་གྱི་ བརྩི་མཐོང་ཆེ་བའི་ དྲན་རྟེན་སྦེ་ སྤྱི་ལོ་ ༢༠༢༤ སྤྱི་ཟླ་ ༡ པའི་ནང་ རབ་གནས་གནང་ཡོདཔ་ད་ རྒྱ་གར་ལུ་ ཆོས་དོན་གྱི་ས་ཁོངས་ རྩ་ཅན་ཅིག་ལུ་ གྱུར་ཡོདཔ་ལས་ མི་རྗེ་བློན་ཆེན་མཆོག་ ས་གནས་དེ་ཁར་ བྱོན་མི་དེ་གིས་ རྒྱ་འབྲུག་ ༢ ཀྱི་བར་ན་ ལམ་སྲོལ་དང་ ཆོས་དོན་གྱི་འབྲེལ་བ་ དམ་ཟབ་ཡོད་པའི་ བརྡ་མཚོན་སྟོནམ་ཨིན་པས།

ཨ་ཡོ་དྷི་ལུ་ གཟིགས་སྐོར་གནང་པའི་ཤུལ་ལས་ མི་རྗེ་བློན་ཆེན་མཆོག་ གཞུང་དོན་ཕྱག་ལཱ་གཞན་ཚུ་གི་དོན་ལས་ ནིའུ་དིལླི་ལུ་ བྱོན་ཡོད་པའི་གནས་ཚུལ།