མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུནམཆོག་གིས་ རྒྱལ་འཛིན་ད་སའི་ཊི་ཀ་ལུ་ བྱིན་གྱིས་བརླབས་གནང་ཡོདཔ།

སྤྱི་ཟླ་ ༩ པའི་ཚེས་ ༢༩ ལུ་ མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུནམཆོག་གིས་ རྒྱལ་ཁབ་ནང་འཁོད་ཀྱི་ རྫོང་ཁག་མཐའ་དབུས་གེ་རའི་ནང་ བཀྲམ་སྤེལ་གྱི་དོན་ལས་ ལྷ་མོ་རྫོང་གཉེར་མའི་ དུས་སྟོན་གྱི་ རྒྱལ་འཛིན་ད་སའི་ཊི་ཀ་ལུ་ བྱིན་གྱིས་བརླབས་གནང་ནུག།

ལྷ་མོ་རྫོང་གཉེར་མའི་དུས་སྟོན་ ད་སའི་ཟེར་མི་དེ་ འབྲུག་གི་ཧིན་དུའི་མི་སྡེ་ནང་ གལ་གནད་ཆེ་བའི་ དུས་སྟོན་ཅིག་ཨིནམ་ད་ དེ་ཡང་ རྒྱལ་ཁབ་ནང་གི་ ཧིན་དུའི་ལྷ་ཁང་ཚུ་ནང་ ཉིན་གྲངས་ ༡༠ གྱི་རིང་ལུ་ གསུང་ཆོག་ཚུ་གནང་སྟེ་ བརྩི་སྲུང་ཞུཝ་ཨིན་པས།

དུས་སྟོན་གྱི་ ཆོ་གའི་མཛད་སྒོ་ཚུ་ མཇུག་བསྡུ་བའི་ཤུལ་ལུ་ ཊི་ཀ་ཟེར་ ཆུམ་དང་ ཞོ་ དེ་ལས་ ཚོས་གསར་ཚུ་ གཅིག་ཁར་བསླ་བསྲེས་ཏེ་ བཟའ་ཚང་ནང་མི་ཚུ་གི་ དཔྱལ་བར་སྦྱར་སྲོལ་ཡོདཔ་ད་ དེ་ཡང་ དཔྱལ་བར་ཊི་ཀ་ཐོབ་མི་ཚུ་ལུ་ ལྷ་མོ་རྫོང་གཉེར་མའི་ བྱིན་རླབས་ལུ་བརྟེན་ཏེ་ འགལ་རྐྱེན་བར་ཆད་ལས་ བསྲུང་ཚུལ་གྱི་ བརྡ་མཚོན་སྟོནམ་ཨིན་ཟེར་བཀོད་ནུག།

རྒྱལ་འཛིན་ཊི་ཀའི་ ལམ་སྲོལ་གྱི་ཐེད་ཁར་ རྒྱལ་ཁབ་མཐའ་དབུས་གེ་རའི་ནང་ བཀྲམ་མི་དེ་གིས་ མི་སེར་ཡོངས་ལུ་ བརྒྱུད་འཛིན་གྱི་ མངའ་བདག་རྒྱལ་པོ་མཆོག་གིས་ སྲུང་སྐྱོབ་མཛད་པའི་ བརྡ་མཚོན་སྟོནམ་ཨིན་པའི་གནས་ཚུལ།