གསུང་གྲོས་སྣ་ཚོགས་ཀྱི་ ཟླ་རིམ་གནས་ཚུལ་ཞལ་འཛོམས།

སྤྱི་ཟླ་ ༡༠ པའི་ཚེས་ ༡ ལུ་ ཟླ་རིམ་གནས་ཚུལ་ཞལ་འཛོམས་ ཐེངས་ ༢༠ པ་ ཚོགས་གནང་ཡོདཔ་བཞིན་དུ་ མི་རྗེ་བློན་ཆེན་མཆོག་དང་ ལྷན་རྒྱས་གཞུང་ཚོགས་ཀྱི་ བློན་པོ་ཚུ་གིས་ བརྡ་བརྒྱུདཔ་ཚུ་ལུ་ རྒྱལ་ཡོངས་ཀྱི་ གནད་དོན་དང་ གཞུང་གི་གཙོ་རིམ་ཚུ་གི་ བརྡ་དོན་ཚུ་ སྦ་གསང་མེད་པར་ བརྗེ་སོར་མཛད་གནང་ནུག།

དེ་ཡང་ གནས་ཚུལ་ཞལ་འཛོམས་ འགོ་བཙུགས་པའི་སྐབས་ལུ་ མི་རྗེ་བློན་ཆེན་མཆོག་གིས་ འཕྲལ་ཁམས་ཅིག་ཁར་ དཔལ་འབྱོར་ལྷན་ཐབས་ལས་རིམ་དང་འབྲེལ་བའི་ མི་མང་གིས་ གྲོས་བསྡུར་བྱུང་མི་ལུ་ གཞུང་གི་ཁ་ཐུག་ལས་ དྭངས་གསལ་དང་ འགན་འཁྲི་ དེ་ལས་ འགན་ཁུར་ཅན་གྱི་ བརྡ་དོན་སྤེལ་ནི་ཚུ་ལུ་ ཁས་ལེན་ཡོད་པའི་ཁར་ གནད་དོན་དེ་ཚུ་ལུ་ གཙོ་བོར་བཟུང་ཡོད་པའི་སྐོར་ལས་ཡང་ གསལ་བཤད་གནང་ཡོདཔ་ཨིན་པས།

དེ་འབདཝ་ལས་ མི་རྗེ་བློན་ཆེན་གྱིས་ བདེན་ཁུངས་ལུ་ གཞི་བརྟེན་ཡོད་པའི་ གནས་ཚུལ་ཚུ་ བཀོད་དགོ་པའི་ ནན་སྐུལ་དང་ ར་ཁུངས་མེད་པའི་ ཚོར་སྣང་ཅན་གྱི་གནས་ཚུལ་ཚུ་གིས་ མི་མང་གི་ བློ་གཏད་ལུ་ གནོད་པ་འབྱུང་ནི་ཨིན་པའི་ དྲན་བརྡ་ཡང་མཛད་ནུག།

གནས་ཚུལ་ཞལ་འཛོམས་དེ་ནང་ གཞན་ཡང་ དཔལ་འབྱོར་ཡར་འཕར་དང་ མི་སྡེའི་ཕན་བདེ་ གཞི་རྟེན་མཁོ་ཆས་ གཞུང་སྐྱོང་ཚུ་གིས་གཙོས་པའི་ རྒྱལ་ཡོངས་ཀྱི་ གནད་དོན་ཚུ་གི་སྐོར་ལས་ཡང་ གསུང་གྲོས་ཚུ་ གནང་ཡོད་པའི་གནས་ཚུལ།