རྒྱལ་གཞུང་དངུལ་ལས་དབང་འཛིན་གྱིས་ འབྲུག་གཞུང་ལུ་ དངུལ་ཀྲམ་ཐེར་འབུམ་ ༣.༥༩ ཕུལ་ཡོདཔ།

སྤྱི་ཟླ་ ༡༠ པའི་ཚེས་ ༡ ལུ་ རྒྱལ་གཞུང་དངུལ་ལས་དབང་འཛིན་གྱིས་ དངུལ་ཀྲམ་ཐེར་འབུམ་ ༣.༥༩ འབྲུག་གཞུང་ལུ་ རྩིས་སྤྲོད་ཞུ་བའི་ མཛད་སྒོ་རྟེན་འབྲེལ་ནང་ མི་རྗེ་བློན་ཆེན་མཆོག་གིས་ དབུ་བཞུགས་མཛད་ཡོདཔ་ད་ མ་དངུལ་དེ་ཡང་ དབང་འཛིན་གྱིས་ ཐབས་ལམ་མ་འདྲ་བའི་སྒོ་ལས་ ཕྱི་ཁར་མ་རྩ་གཞི་བཙུགས་འབད་མི་ལས་ཐོབ་པའི་ དངུལ་ལྷག་ཨིན་པས།

དེ་བསྒང་ མི་རྗེ་བློན་ཆེན་གྱིས་ རྒྱལ་གཞུང་དངུལ་ལས་དབང་འཛིན་གྱིས་ འབྲུག་གཞུང་ལུ་ ཕན་ཐོགས་ཆེ་བའི་ མ་དངུལ་ཕུལ་མི་ལུ་ བཀྲིན་དགའ་ཚོར་ཡོད་ལུགས་དང་ ལྷག་པར་དུ་ཡང་ དབང་འཛིན་དང་ ལས་གཡོགཔ་ཚུ་གིས་ ནད་ཡམས་ཀོ་ཝིཌ་གི་ དུས་སྐབས་ནང་ བརྩོན་ཤུགས་བསྐྱེད་མི་ལུ་ཡང་ ངལ་རངས་ཡོད་ལུགས་ཚུ་ གསུངས་གནང་ནུག།

དེ་མ་ཚད་ དོ་འགྲན་ཅན་གྱི་ དུས་སྐབས་ཚུ་ནང་ རྒྱལ་ཁབ་ཀྱི་ དཔལ་འབྱོར་ཡུན་བརྟན་གྱི་དོན་ལུ་ རྒྱལ་གཞུང་དངུལ་ལས་དབང་འཛིན་གྱིས་ གལ་གནད་ཆེ་བའི་ འགན་ཁུར་འབག་མི་ལུ་ཡང་ ངོས་ལེན་ཡོད་ཟེར་ གསུངས་ཡོད་པའི་གནས་ཚུལ།