ཤྲཱི་ལངྐ་ལུ་ ཆུ་རུད་དང་ ས་རུད་ཀྱིས་ མི་གྲངས་ ༥༦ དེ་ཅིག་ལུ་ ཤི་རྐྱེན་དང་ གཞན་མི་ ༢༡ དེ་ཅིག་བྱང་སྟོར།

བི་བི་སི།

སྤྱི་ཟླ་ ༡༡ པའི་ཚེས་ ༢༨ ལུ་ དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ བདུན་ཕྲག་འདི་ནང་ ཤྲཱི་ལངྐ་ལུ་ ཆརཔ་ཤུགས་སྦེ་ རྐྱབ་མི་ལུ་བརྟེན་ཏེ་ ཆུ་རུད་དང་ ས་རུད་ཀྱིས་ མི་གྲངས་ ༥༦ དེ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ གཞན་མི་ ༢༡ དེ་ཅིག་ཡང་ བྱང་སྟོར་ཤོར་ནུག་ཟེར་ཨིན་པས།

དེ་སྦེ་ ཤི་རྐྱེན་བྱུང་མི་ཚུ་གི་གྲས་ལས་ དབུས་ཕྱོགས་རྫོང་ཁག་ བཱ་ཌུ་ལ་ལུ་ ཇ་འཛུགས་སྐྱོང་འབད་སའི་ ས་ཁོངས་ནང་ ས་རུད་ཆད་དེ་ སྡོད་ཁྱིམ་ཚུ་ འཕྱགས་བདའ་བའི་ཁར་ མི་གྲངས་ ༢༡ ལུ་ཡང་ ཤི་རྐྱེན་བྱུང་ཡོདཔ་སྦེ་ རྐྱེན་ངན་འཛིན་སྐྱོང་ལྟེ་བ་གིས་ གསལ་བཤད་འབད་ནུག།

ཆུ་རུད་ཀྱིས་ གནོད་སྐྱོན་བྱུང་མི་ བཟའ་ཚང་ཚུ་གི་དོན་ལས་ གནས་སྐབས་ཀྱི་ སྡོད་སྒར་ཚུ་ རྐྱབ་བྱིན་ཡོདཔ་ད་ ད་རུང་ཡང་ རྒྱལ་ཁབ་ཀྱི་ ཤར་ཕྱོགས་རྒྱ་མཚོའི་མཐའ་མར་ རླུང་འཚུབ་སྦོམ་སྦེ་ འཕུ་ནི་གི་ ཉེན་ཁ་ཡོདཔ་ལས་ ཉེན་སྲུང་གི་དོན་ལུ་ གྲ་སྒྲིག་འབད་དོ་ཟེར་ཨིན་པས།

ཤྲཱི་ལངྐ་ལུ་ གཙང་ཆུའི་གནས་ཚད་དེ་ འཕྲོ་མཐུད་དེ་ར་ ཡར་སེང་འགྱོ་དོ་ཡོདཔ་ལས་ རྐྱེན་ངན་འཛིན་སྐྱོང་ལྟེ་བ་གིས་ ས་གནས་དམའ་སར་ སྡོད་མི་ཚུ་ ས་ཁ་མཐོ་སར་ སྤོ་བཤུད་འབད་དགོ་པའི་ ཉེན་བརྡ་འབད་ནུག།

ཆུ་གཡུར་ལས་ཁུངས་ཀྱིས་ ཀེ་ལ་ནི་ གཙང་ཆུ་དེ་ ཡར་འཕར་འགྱོཝ་ལས་ རྒྱལ་ས་ཀོ་ལོམ་བོ་གིས་གཙོས་པའི་ ས་ཁ་དམའ་སའི་ ལུང་གཤོང་ཚུ་ནང་ ཆུ་རུད་འཐོན་ནི་གི་ ཉེན་ཁ་ཡོད་པའི་སྐོར་ལས་ཡང་ ཉེན་བརྡ་འབད་ཡོདཔ་ཨིན་པས།

དེ་བཟུམ་མའི་ ཆུ་རུད་ཀྱི་ ཉེན་ཁ་ལུ་བརྟེན་ཏེ་ མཐོ་རིམ་ཤེས་ཡོན་གྱི་ ཆོས་རྒྱུགས་ཚུ་ཡང་ ཕར་འཕུལ་རྐྱབ་ཡོདཔ་ད་ ཤྲཱི་ལངྐ་ལུ་ ཆུ་རུད་སྦོམ་ཤོས་དེ་ སྤྱི་ལོ་ ༢༠༠༣ སྤྱི་ཟླ་ ༦ པའི་ནང་ ཐོན་ཡོདཔ་བཞིན་དུ་ མི་གྲངས་ ༢༥༤ དེ་ཅིག་ལུ་ ཤི་རྐྱེན་དང་ མི་སེར་སྟོང་ཕྲག་ལེ་ཤ་ཅིག་ སྡོད་གནས་སྤོ་དགོཔ་ བྱུང་ནུག་ཟེར་ བཀོད་འདུག་པའི་གནས་ཚུལ།