རྒྱ་གར་གྱི་རྒྱལ་ས་ དིལླི་ལུ་ བཙོག་རླུང་དུག་ཅན་གྱིས་ ཨ་ལོ་ཚུ་ལུ་གནོད་སྐྱོན།

བི་བི་སི།

རྒྱ་གར་གྱི་རྒྱལ་ས་ དིལླི་ལུ་ གནམ་ཁར་ས་སྨུག་བཟུམ་སྦེ་ ཁྱབ་སྤེལ་སོང་སྟེ་ཡོད་མི་ བཙོག་རླུང་དུག་ཅན་གྱིས་ ཁྲོམ་ཚོགས་དེ་ནང་གི་ མི་སེར་ཚུ་ལུ་ གནོད་པ་འབྱུང་དོ་ཡོད་པའི་ནང་ལས་ཡང་ ལྷག་པར་དུ་ ཨ་ལོ་ཚུ་ལུ་ གནོདཔ་མང་སུ་ འབྱུང་དོ་ཡོདཔ་སྦེ་བཀོད་ནུག།

དེ་ཡང་ ཨ་ལོའི་སྨན་ཁང་ཚུ་ནང་ ཌོག་ཊར་གྱི་ ཁང་མིག་ཕྱི་ཁར་ མི་མང་སྒུག་སྡོད་སའི་ ས་ཁོངས་ཚུ་ནང་ ཚ་གྱང་ལང་མི་ ཨ་ལོའི་ཕམ་ཚུ་ ཨ་ལོ་ཨག་ཚི་རྐྱབ་མི་དང་ གློ་ཁོག་མི་ དབུགས་གཏོང་ལེན་འབད་ནི་ལུ་ དཀའ་ངལ་ཡོད་མི་ཚུ་དང་གཅིག་ཁར་ གྱལ་རིམ་ནང་ ལོང་སྡོདཔ་ཨིན་པས།

དིལླི་ལུ་ དེ་བཟུམ་མའི་ བཙོག་རླུང་དུག་ཅན་གྱི་ གནས་ཚད་དེ་ ཉེན་ཁ་ཅན་ལུ་ མར་བབས་འགྱོ་མི་ལུ་བརྟེན་ཏེ་ སྤྱི་ཟླ་ ༡༠ པའི་ནང་ལས་ར་ ཨ་ལོ་ཚུ་ལུ་ ནད་གཞི་ཐོབ་ནི་ འགོ་བཙུགས་ཡོདཔ་ལས་ ཌོག་ཊར་ཚུ་དང་ ཕྱད་ནིའི་དོན་ལུ་ མི་མང་སྒུག་སྡོད་སའི་ ས་ཁོངས་ཚུ་ནང་ ཨ་རྟག་དང་ཕྱདཔ་ད་ དུས་ཡུན་རིངམོ་སྦེ་ར་ སྒུག་སྡོད་དགོཔ་ འབྱུང་དོ་ཡོདཔ་སྦེ་བཀོད་ནུག།

བཙོག་རླུང་དུག་ཅན་གྱི་ དཀའ་ངལ་དེ་ དིལླི་དང་ རྒྱ་གར་བྱང་ཕྱོགས་ཀྱི་ ས་གནས་ཚུ་ནང་ གནམ་དགུན་གྱི་ དུས་ཚོད་ཁར་ ཨ་རྟག་ར་ འཐོནམ་ཨིན་པས་ཟེར་ བཀོད་འདུག་པའི་གནས་ཚུལ།