འབྲུག་གི་ནང་པའི་སྨན་བཅོས་ནང་ འབྱུང་རབས་ཅན་གྱི་བརྡ་མཚོན།

པདྨ་དབང་འདུས།

སྤྱི་ཟླ་ ༡༡ པའི་ཚེས་ ༢༨ ལུ་ འབྲུག་གི་གསོ་བ་རིག་པ་ གཞི་སྒྱུར་གྱི་ ལས་སྣ་དང་འབྲེལ་ཏེ་ ཀ་ཝ་བྱང་ས་ ནང་པའི་སྨན་ཁང་གི་ སྤྱི་དོན་ཁང་ནང་སྦེ་ ནང་པའི་སྨན་བཅོས་ཞབས་ཏོག་གི་ རྒྱལ་ཡོངས་ལྟེ་བ་དང་ རྒྱལ་ཡོངས་ནང་པའི་ སྨན་བཅོས་ཐབས་བྱུས་དང་ ལག་ལེན་འཆར་གཞི་ ༢༠༢༥-༢༦ ཅན་མའི་ འགོ་འབྱེད་རྟེན་འབྲེལ་དང་གཅིག་ཁར་ གནང་སྦྱིན་ཆིངས་ཡིག་གུ་ མཚན་རྟགས་བཀོད་མི་ཚུ་ ནང་པའི་སྨན་བཅོས་ནང་ འབྱུང་རབས་ཅན་གྱི་ དུས་བསྐལ་ཅིག་ཨིན་པས། 

ཐབས་བྱུས་དང་ ལག་ལེན་འཆར་གཞི་ ༢༠༢༥-༢༦ ཅན་མ་དེ་གིས་ ཞབས་ཏོག་སྤྲོད་ནི་དང་ ཤེས་ཡོན་སྤེལ་ནི་ ཞིབ་འཚོལ་འབད་ནི་ སྨན་རིགས་ཀྱི་ཐོན་ཁུངས་འཛིན་སྐྱོང་ དེ་ལས་ བདེ་ཉམས་ལུ་ ལས་སྣ་གསར་བཏོད་ཚུ་གི་དོན་ལས་ སྔོན་དཔག་ཅན་གྱི་ ལམ་སྟོན་འབད་ནི་ཨིནམ་ད་ གསོ་བ་རིག་པ་དེ་ འཕྲོ་མཐུད་དེ་ར་ དེང་སང་གི་ གསོ་བའི་སྐྱོང་བཞག་དང་ མཐུན་སྒྲིག་ཐོག་ལས་ ཡར་འཕེལ་བཟོ་ནི་ཨིན་པས།

དེ་མ་ཚད་ ནང་པའི་སྨན་བཅོས་ཞབས་ཏོག་གི་ རྒྱལ་ཡོངས་ལྟེ་བ་ འགོ་འབྱེད་འབད་མི་དེ་ ནད་པའི་སྨན་བཅོས་དང་ གསར་བཏོད་ལས་སྣ་ སྦྱོང་བརྡར་ ཉམས་སྲུང་ཚུ་ རྒྱལ་ཡོངས་ལྟེ་བ་ཅིག་གི་ནང་ལས་འབད་ནི་ལུ་ གལ་གནད་ཅན་གྱི་ གཙུག་སྡེ་གཞི་སྒྱུར་ཅིག་ཨིན་པས།

འབྲུག་གཞི་ཚོགས་ཀྱིས་ རྒྱལ་ཁབ་ནང་ ནང་པའི་སྨན་བཅོས་ཞབས་ཏོག་ བཙན་ཐབས་ལུ་ ལྷན་ཐབས་གསརཔ་ཚུ་དང་སྦྲགས་ཏེ་ འཕྲོ་མཐུད་དེ་ར་ ནང་པའི་སྨན་བཅོས་ནང་ མཉམ་འབྲེལ་འབད་མི་དང་ གཏོང་ཕོད་ཅན་གྱི་ རྒྱབ་སྐྱོར་འབད་བའི་ཁར་ ད་ལས་ཕར་ཡང་ དུས་མེད་ཤེས་རབ་དང་ དེང་རབས་ཀྱི་ ཡར་འཕེལ་ ༢ མཉམ་འབྲེལ་ཐོག་ལས་ འཕྲོད་བསྟེན་དང་ བདེ་སྐྱིད་ གཅིག་སྒྲིལ་ཚུ་གི་དོན་ལུ་ མདུན་བསྐྱོད་འབད་ཚུགས་པའི་ རེ་འདུན་ཡོདཔ་ཨིན་པའི་གནས་ཚུལ།