སྟོན་པ་བཅོམ་ལྡན་འདས་ཀྱིས་ བདེན་བཞིའི་ཆོས་འཁོར་བསྐོར་བའི་ དུས་ཆེན་ཁྱད་པར་ཅན་བརྩི་སྲུང་།

རང་ཟླ་ ༦ པའི་ཚེས་ ༤ ལུ་ སྟོན་པ་བཅོམ་ལྡན་འདས་ཀྱིས་ རྒྱ་གར་ཝཱ་རཱ་ཎ་སི་ལུ་ བདེན་བཞིའི་ཆོས་འཁོར་བསྐོར་བའི་ དུས་ཆེན་ཁྱད་པར་ཅན་དང་བསྟུན་ཏེ་ དཔལ་ལྡན་འབྲུག་པའི་ ཆོས་ཀྱི་དབུ་ཁྲིད་དམ་པ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ ཐིམ་ཕུ་ཆོས་རྫོང་གི་ ཀུན་ར་བར་ཐོག་ལུ་ རྒྱལ་ཁབ་དང་ བསྟན་འགྲོའི་དོན་ལས་ བྱིན་རླབས་ཅན་གྱི་གཏེར་ཆེན་ རྣམ་རྒྱལ་སྟོང་མཆོད་ཀྱི་ གསུང་ཆོག་ནང་ དབུ་བཞུགས་མཛད་གནང་ཡོདཔ་ཨིན་པས།

དེ་བཟུམ་སྦེ་ ཀུན་རའི་ནང་ འབུམ་སྡེ་སློབ་དཔོན་མཆོག་ དབུ་བཞུགས་ཐོག་ལས་ རྒྱལ་ཁབ་ཀྱི་ མངའ་ཐང་དང་ རྒྱལ་བསྟན་ཆོས་ཀྱི་ ཞབས་བརྟན་ལུ་དམིགས་ཏེ་ ལོ་བསྟར་གནང་སྲོལ་ཡོད་པའི་ ཉིན་གྲངས་ ༥ གི་ གཙུག་ཏོར་རྣམ་རྒྱལ་མའི་ གསུང་ཆོག་ཡང་ ཟབ་རྒྱས་ཀྱི་སྒོ་ལས་ འགོ་བཙུགས་གནང་ནུག།

དེ་མ་ཚད་ བཀྲིས་ཆོས་རྫོང་གི་ རྡོ་གཅལ་ཆེན་མོའི་ནང་ བྱིན་རླབས་ཀྱི་ གཟི་འོད་འབར་བའི་ ནང་རྟེན་བྱིན་ཅན་ཚུ་ དད་ལྡན་མི་དམངས་ཡོངས་ཀྱི་ བསོད་ནམས་ཀྱི་ ཞིང་མཆོག་ལུ་ མཇལ་ཁ་གནང་ཡོད་པའི་གནས་ཚུལ།