ཨཕ་གྷ་ནིཛ་ཏཱན་གྱི་ ཨམ་སྲུ་ཚུ་ གཙུག་ལག་ཤེས་ཡོན་སྦྱང་ནི་ལས་བཀག་དམ།

རོའི་ཊརཛ།
སྤྱི་ཟླ་ ༡༢ པའི་ཚེས་ ༢༡ ལས་ ཏ་ལི་བཱན་གཞུང་གིས་ ཨམ་སྲུ་ཚུ་ གཙུག་ལག་ཤེས་ཡོན་སྦྱང་ནི་ལས་ མཚམས་འཇོག་འབད་དེ་ ཨཕ་གྷ་ནིཛ་ཏཱན་གྱི་ སློབ་ཕྲུག་ཨམ་སྲུ་ཚུ་ གཙུག་ལག་སློབ་སྡེ་ཚུ་ནང་ འཛུལ་མ་སྟེར་བར་ བཞག་ཡོདཔ་ཨིན་པས།
དེ་ཡང་ སྤྱི་ཟླ་ ༡༢ པའི་ཚེས་ ༡༩ ལུ་ མཐོ་རིམ་ཤེས་རིག་ལྷན་ཁག་ལས་ གཙུག་ལག་སློབ་སྡེ་ཚུ་ལུ་ ཡིག་ཐོག་གསལ་བསྒྲགས་ཅིག་ བཀྲམ་སྤེལ་འབད་དེ་ བཀག་དམ་འབད་ཡོདཔ་ད་ དེ་སྦེ་ བཀག་དམ་འབད་མི་ལུ་ ཕྱིའི་རྒྱལ་ཁབ་ཁག་གི་ གཞུང་ཚུ་དང་ འཛམ་གླིང་སྤྱི་ཚོགས་ཀྱིས་ ཁ་གཏངམ་ཨིན་པས།
ཨཕ་གྷ་ནིཛ་ཏཱན་ ཀ་བཱུལ་ལུ་ གཙུག་ལག་ཤེས་ཡོན་སྦྱང་མི་ ཨམ་སྲུ་ཅིག་གིས་ བཤད་དོ་བཟུམ་འབད་བ་ཅིན་ ཁོང་ཆ་ཁྱབ་ གཙུག་ལག་སློབ་སྡེའི་ སྒོ་ར་ཁར་ལྷོདཔ་ད་ ནང་ན་འཛུལ་མི་ཆོག་ཟེར་ ལོག་བཏང་ཡོདཔ་ལས་ སློབ་ཕྲུག་ག་ར་ སྔུ་ཡི་ཟེར་ཨིན་པས།
ཨཕ་གྷ་ནིཛ་ཏཱན་ གཙུག་ལག་སློབ་སྡེ་ཅིག་གི་ ལེགས་སྦྱར་བ་ཅིག་གིས་ སློབ་ཕྲུག་ཨམ་སྲུ་ཚུ་ ཏ་ལི་བཱན་གཞུང་གི་ བཀོད་རྒྱ་དང་འཁྲིལ་ཏེ་ ལོག་མ་བཏང་པར་ ཐབས་མེདཔ་སོང་་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: