མི་དབང་མངའ་བདག་རིན་པོ་ཆེ་མཆོག་ དམག་སྦྱོང་མཇུག་བསྡུའི་རྟེན་འབྲེལ་ནང་ཆིབས་བསྐྱོད།

སྤྱི་ཟླ་ ༡༢ པའི་ཚེས་ ༢༡ ལུ་ མི་དབང་མངའ་བདག་རིན་པོ་ཆེ་མཆོག་ དབང་འདུས་ཕོ་བྲང་ བསྟན་སྐྱོང་གླིང་ལུ་ རྒྱལ་གཞུང་འབྲུག་གི་དམག་སྡེའི་ནང་ ཕོ་སྐྱེས་ཀྱི་ དམག་སྦྱོང་ཐེངས་ ༧༨ པ་དང་ ཨམ་སྲུའི་དམག་སྦྱོང་ཐེངས་ ༢ པ་ མཇུག་བསྡུའི་རྟེན་འབྲེལ་ནང་ ཆིབས་བསྐྱོད་གནང་ནུག།
དེ་ཡང་ ལོ་ངོ་ ༡ གི་ དམག་སྦྱོང་མཇུག་བསྡུ་མི་ ཕོ་ ༡༥༡ དང་ མོ་ ༡༤༩ འབད་མི་ དམག་མི་ཚུ་ རྒྱལ་ཁབ་མཐའ་དབུས་མེད་པའི་ ས་ཁོངས་ཚུ་ནང་ རྒྱལ་གཞུང་འབྲུག་གི་དམག་སྡེ་འོག་ལུ་ ཕྱག་ཞུ་ནི་ཨིན་པས།
མི་དབང་མངའ་བདག་རིན་པོ་ཆེ་མཆོག་གིས་ དམག་སྦྱོང་མཇུག་བསྡུ་མི་ཚུ་ལུ་ གསུང་བཤད་གནང་པའི་ནང་གསལ་ དུས་རབས་ ༢༡ པའི་ནང་ སྲུང་སྐྱོབ་ཀྱི་ ཁྱད་ཆོས་མ་འདྲཝ་ ལེ་ཤ་ཅིག་ཡོད་པའི་ནང་ལས་ ས་མཚམས་སྲུང་སྐྱོབ་ཀྱིས་མ་དོ་བར་ དཔལ་འབྱོར་སྲུང་སྐྱོབ་དང་ འཕྲུལ་རིག་ཡོངས་འབྲེལ་སྲུང་སྐྱོབ་ བཟའ་འཐུང་དང་ སྡོད་གནས་སྲུང་སྐྱོབ་ དེ་ལས་ གནམ་གཤིས་འགྱུར་བ་དང་ རང་བཞིན་རྐྱེན་ངན་ཚུ་དང་འབྲེལ་བའི་ སྲུང་སྐྱོབ་ཚུ་ཡོད་ཟེར་ཨིན་པས།
དེ་མ་ཚད་ སྲུང་སྐྱོབ་ཀྱི་ ཐབས་ལམ་དེ་ཡང་ ནད་མ་འོངམ་ལས་ རིམ་འགྲོ་དང་ ཆུ་མ་འོངམ་ལས་ཟམ་ཟེར་ སླབ་དོ་བཟུམ་སྦེ་ གདོང་ལེན་འབད་ནི་ལུ་ མ་སྒུགས་པར་ སྔ་གོང་ལས་ གྲ་སྒྲིག་འབད་ནི་དེ་ ག་ནི་བ་ གལ་ཆེ་ཟེར་ གསུངས་གནང་འདུག་པའི་གནས་ཚུལ།

Please follow and like us: