ཕྱིའི་རྒྱལ་ཁབ་ ༡༡༣ གྱི་ནང་ འབྲུག་མི་ ༣༢,༢༥༨ ཡོད་མི་ལས་ ཨཱཛ་ཊེ་ལི་ཡ་ལུ་ ༡༠,༩༡༡ ཡོདཔ།

ནོར་བུ་བཟང་མོ།
ཕྱི་འབྲེལ་དང་ ཕྱིར་ཚོང་ལྷན་ཁག་གི་བློན་པོ་ ཌོག་ཊར་རྟ་མགྲིན་རྡོ་རྗེ་གིས་ གསུངས་དོ་བཟུམ་འབད་བ་ཅིན་ ཕྱིའི་རྒྱལ་ཁབ་ ༡༡༣ གྱི་ནང་ འབྲུག་མི་ ༣༢,༢༥༨ དེ་ཅིག་ཡོད་མིའི་གྲས་ལས་ མང་ཤོས་ར་ ཨཱཛ་ཊེ་ལི་ཡ་ལུ་ ༡༠,༩༡༡ ཡོདཔ་ད་ དེ་ལས་ རྒྱ་གར་ལུ་ ༩,༥༡༩ དང་ ཀུ་ཝེཊ་ལུ་ ༣,༡༨༤ ཡོད་ཟེར་ཨིན་པས།
དེ་ཡང་ ཕྱི་འབྲེལ་དང་ ཕྱིར་ཚོང་ལྷན་ཁག་ནང ཐོ་བཀོད་འབད་མི་ཚུ་ཨིནམ་ད་ ཐོ་བཀོད་ཀྱི་ ལམ་ལུགས་དེ་ སྤྱི་ལོ་ ༢༠༢༠ ལུ་ ནད་ཡམས་ཀོ་ཝིཌ་-༡༩ ཐོན་པའི་ཤུལ་ལས་ ཕྱི་རྒྱལ་ལུ་སྡོད་མི་ འབྲུག་མི་ཚུ་ལུ་ ཆ་རོགས་འབད་ནིའི་དོན་ལས་ འགོ་བཙུགས་ནུག།
མི་རྗེ་བློན་ཆེན་ ཌོག་ཊར་བློ་གྲོས་ཚེ་རིང་གིས་ འབྲུག་མི་ལེ་ཤ་ཅིག་ དེ་སྦེ་ ཕྱི་རྒྱལ་ལུ་ འགྱོ་མི་དེ་ གོ་སྐབས་ལེགས་ཤོམ་འཚོལ་ཏེ་ འགྱོཝ་མ་ཚད་ ད་རེས་ནངས་པར་ རྒྱལ་ཁབ་ནང་ ཞི་གཡོག་ལེགས་བསྒྱུར་དང་ ལེགས་བཅོས་ཀྱི་ ལས་སྣ་ཚུ་ འགོ་བཙུགས་ནི་དེ་གིས་ཡང་ འོང་ནི་མས་གསུངས་ཡི།
འབྲུག་མི་ཚུ་ ཕྱི་རྒྱལ་ལུ་ འགྱོ་ནི་ལས་ བཀག་ནིའི་དོན་ལུ་ གཞུང་གིས་ ཕྱག་ལཱ་ག་ཅི་ར་ མཛད་དོ་ག་ཟེར་ གནས་ཚུལ་བསྡུ་བཀོདཔ་ཚུ་གིས་ དྲི་བ་ཞུ་བའི་ལན་ལུ་ མི་རྗེ་བློན་ཆེན་མཆོག་གིས་ འབྲུག་མི་ཚུ་ ཕྱི་རྒྱལ་ཁབ་ལུ་ འགྱོ་ནི་ལས་ བཀག་ནི་གི་ ཐབས་ལམ་གཙོ་བོ་ར་ ལེགས་བཅོས་ཀྱི་ ལཱ་ཚུ་ཨིན་ཟེར་གསུངས་ཡི།
དེ་འབདཝ་ལས་ ཧེ་མར་ ཞི་གཡོག་ནང་ལས་ དགོངས་ཞུ་འབད་བའི་ཤུལ་ལུ་ ལོག་འཛུལ་མ་ཆོགཔ་སྦེ་ཡོད་མི་ ཞི་གཡོག་བཅའ་ཁྲིམས་འདི་ ལེགས་བཅོས་འབད་དེ་ ད་ལས་ཕར་ མི་ག་ར་གིས་ རང་སོའི་ལྕོགས་གྲུབ་དང་ རིག་རྩལ་དང་བསྟུན་པའི་ ཞི་གཡོག་ནང་ ལོག་སྟེ་ར་ འཛུལ་ཆོགཔ་སྦེ་ བཟོ་ཡི་ཟེར་ཨིན་པས།
ཕྱི་འབྲེལ་བློན་པོ་གིས་ སྤྱི་ལོ་ ༢༠༢༡ དང་ ༢༠༢༢ ཀྱི་ ནང་འཁོད་ལུ་ར་ འབྲུག་མི་ལེ་ཤ་ཅིག་ ཕྱི་རྒྱལ་ལུ་ འགྱོ་ནི་དེ་གིས་ ཚ་གྱང་ལང་དགོཔ་ ཐོན་ཡོད་རུང་ ལོ་ ༤ དང་ ༥ གི་རྒྱབ་ལས་ འབྲུག་ལུ་ ལོག་འོང་མི་དང་ ཕྱི་རྒྱལ་ལུ་འགྱོ་མིའི་ ཚད་གཞི་དེ་ ཚད་སྙོམ་འགྱོ་འོང་ཟེར་ཨིན་པས།
ཨིན་རུང་ སྤྱི་ལོ་ ༢༠༢༤ གི་ཤུལ་ལས་ཡང་ ད་རེས་ནངས་པར་བཟུམ་སྦེ་ར་ འབྲུག་མི་ཚུ་ ཕྱི་རྒྱལ་ཁབ་ལུ་ འཕྲོ་མཐུད་དེ་ར་ འགྱོ་བ་ཅིན་ ཚ་གྱང་ལང་དགོཔ་དང་ ཐབས་ལམ་སྟོན་དགོ་པའི་ གནས་སྟངས་ཚུ་ ཤར་འོང་ཟེར་ གསུངས་ཡོད་པའི་གནས་ཚུལ།

Please follow and like us: