ཀེ་ན་ཌ་ལུ་ ཨ་ལོ་བུམོ་ཅིག་གིས་ རྩེད་ཐེངས་དང་པའི་ནང་ རྒྱན་ཤོག་གི་གསོལ་རས་ ཌོ་ལར་ས་ཡ་ ༤༨ ཐོབ་ཡོདཔ།

བི་བི་སི།
ཀེ་ན་ཌ་ལུ་ སྐྱེས་ལོ་ ༡༨ འབད་མི་ བུམོ་ཅིག་གིས་ རྩེད་ཐེངས་དང་པའི་ནང་ར་ རྒྱན་ཤོག་གི་ གསོལ་རས་སྦོམ་ ཐོབ་ཡོདཔ་ལས་ དེ་སྦེ་ གསོལ་རས་ཐོབ་པའི་འཕྲལ་ལས་ མོ་གིས་ ཨ་པ་ཟེར་འབོ་མི་ དངུལ་འབྲེལ་རྩིས་འཛིན་པ་ལུ་ བརྡ་ལེན་འབད་ནུག།
བུམོ་དེ་གིས་ རྒྱན་ཤོག་གསོལ་རས་ ཌོ་ལར་ས་ཡ་ ༤༨ ཐོབ་ནི་དེ་ ཀེ་ན་ཌའི་ རྒྱལ་ཁབ་ནང་ མཐོ་ཤོས་ཅིག་དང་ ལོ་ན་གཞོན་ཤོས་ཨིནམ་ད་ གཙུག་ལག་སློབ་གྲྭའི་ སློབ་ཕྲུག་ཨིན་མི་ ཇུ་ལིཊ་ལེ་མོར་གྱིས་ གསོལ་རས་དེ་ མོ་རའི་ཤེས་ཡོན་གྱི་དོན་ལུ་ ཟད་འགྲོ་བཏང་སྟེ་ ཌོག་ཊར་འབད་ནི་གི་ འཆར་གཞི་ཡོད་ཟེར་ཨིན་པས།
ཨོན་ཌེ་རི་ཡོ་ རྒྱན་ཤོག་དང་ རྩེད་རིགས་ལས་འཛིན་ནང་སྦེ་ འདས་པའི་ཟླཝ་ནང་ཐོབ་མི་ གསོལ་རས་ཀྱི་ རྟེན་འབྲེལ་བརྩི་སྲུང་འབད་སར་ མོ་གིས་ བཤད་དོ་བཟུམ་འབད་བ་ཅིན་ རྒྱན་ཤོག་གསོལ་རས་ ཐོབ་པའི་སྐབས་ལུ་ སྔུ་དགོཔ་བྱུང་ཡོདཔ་མ་ཚད་ ད་ལྟོ་ཡང་ དེ་བཟུམ་མའི་ གསོལ་རས་ཐོབ་མི་དེ་ བདེན་རྫུན་རེ་མ་ཚུགས་པར་ཡོད་ཟེར་ཨིན་པས།
ལེ་མོར་གྱིས་ སྤྱི་ཟླ་ ༡ པའི་ཚེས་ ༧ ལུ་ གསལ་སྟོན་འབད་མི་ རྒྱན་ཤོག་གསོལ་རས་དེ་ མོ་གིས་ཐོབ་ནུག་ཟེར་ མ་གོ་ཚུན་ལུ་ རྒྱན་ཤོག་གི་སྐོར་ལས་ སེམས་ཁ་ལས་ཡང་ བརྗེད་ཡོདཔ་སྦེ་ཨིན་པས།
དེ་ཚེ་ མོ་གིས་ འགྲུལ་འཕྲིན་ཐོག་ལས་ བརྟག་དཔྱད་འབདཝ་ད་ མོ་གི་ཤོག་འཛིན་དེ་གིས་ གསོལ་རས་སྦོམ་ ཐོབ་ཡོདཔ་སྦེ་ འགྲུལ་འཕྲིན་ཐོག་ལུ་ སླབ་ཡོདཔ་ལས་ མི་ག་ར་གིས་ ཌོ་ལར་ས་ཡ་ ༤༨ གསོལ་རས་ཐོབ་ཡོད་པའི་སྐོར་ལས་ སྐད་ཤུགས་རྐྱབ་ཅི་ཟེར་ཨིན་པས།
མོ་གིས་ གསོལ་རས་ཐོབ་མིའི་གྲས་ལས་ མང་ཤོས་ཅིག་ མོ་ར་གིས་ ཨ་པ་ཟེར་འབོ་མི་ དངུལ་རྩིས་འཛིན་སྐྱོང་པའི་ གྲོགས་རམ་ཐོག་ལུ་ མ་རྩ་གཞི་བཙུགས་འབད་ནི་གི་ འཆར་གཞི་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: