རྒྱ་ནག་ལུ་ ཨིང་ལིཤ་ཆོས་ཚན་གྱི་ ཆོས་རྒྱུགས་ཆ་མེད།

སི་ཨེན་ཨེན།
རྒྱ་ནག་གི་ ནུབ་བྱང་ཕྱོགས་ལུ་ཡོད་མི་ གཙུག་ལག་སློབ་སྡེ་མཐོ་ཤོས་ཅིག་གིས་ མཐོ་རིམ་ཤེས་ཚད་ མཐར་འཁྱོལ་ནི་ལུ་ ཨིང་ལིཤ་གི་ ཤེས་ཚད་མ་དགོཔ་སྦེ་ ཨིང་ལིཤ་ཆོས་ཚན་གྱི་ ཆོས་རྒྱུགས་ཆ་མེད་བཏང་ནུག།
དེ་ཡང་ སྲིད་འཛིན་ཛི་ཇིན་པིང་གི་འོག་ལུ་ རྒྱལ་གཅེས་ཤ་ཞེན་གྱི་ མི་གྲངས་ཡར་སེང་ཐོན་ཡོད་མི་ཚུ་གིས་ འཛམ་གླིང་ནང་གི་ ཨིང་ལིཤ་སྐད་ཡིག་དེ་ དགོས་མཁོ་མེད་པའི་སྐོར་ལས་ རྩོད་འགྲན་ལེ་ཤ་ཅིག་ བྱུང་པའི་ཤུལ་ལུ་ ཆ་མེད་བཏང་ཡོདཔ་ཨིན་པས།
ཞི་ཨཱན་ཇི་ཡའོ་ཏོང་ གཙུག་ལག་སློབ་སྡེ་གིས་ གསལ་བསྒྲགས་ཅིག་ནང་ བཀོད་དོ་བཟུམ་འབད་བ་ཅིན་ སློབ་ཕྲུག་ཚུ་གིས་ མཐོ་རིམ་ཤེས་ཚད་ མཐར་འཁྱོལ་གྱི་དོན་ལུ་ ཨིང་ལིཤ་ནང་ མཐར་འཁྱོལ་མིན་དགོ་ཟེར་ བཀོད་དེ་ཡོདཔ་མ་ཚད་ ཨིང་ལིཤ་ཐོག་ལུ་ ཆོས་རྒྱུགས་ཡང་ བཀལ་མིན་དགོ་ཟེར་བཀོད་ནུག།.
སྤྱི་ལོ་ ༡༩༨༧ ལུ་ འགོ་དང་པ་ མཐོ་རིམ་ཤེས་ཚད་ཚུ་ ཨིང་ལིཤ་སྐད་ཡིག་གི་ ཆོས་རྒྱུགས་དང་སྦྲགས་ཏེ་ མཐར་འཁྱོལ་དགོཔ་སྦེ་ ཚད་གཞི་བཀོད་དེ་ཡོད་རུང་ གཞུང་གི་ཁ་ཐུག་ལས་ དེ་བཟུམ་མའི་ སྲིད་བྱུས་ཚུ་ ག་ནི་ཡང་ མེདཔ་ཨིན་པས།
ཨིན་རུང་ འཕྲལ་ཁམས་ཀྱི་ ལོ་ཚུ་ནང་ གཙུག་ལག་སློབ་སྡེ་ ལ་ལོ་ཅིག་གིས་ ཨིང་ལིཤ་གི་ གལ་གནད་མར་ཕབ་འབད་དེ་ ཆོས་ཚན་གཞན་གྱིས་ ཚབ་འཛིན་འབད་ཡོདཔ་ད་ ལ་ལོ་ཅིག་ནང་ ཆོས་རྒྱུགས་བཀལ་མ་དགོཔ་བཟོ་ནུག།
སློབ་གྲྭ་དང་ གཙུག་ལག་སློབ་སྡེ་ཚུ་ནང་ སློབ་དཔོན་ཚུ་གིས་ འཛམ་གླིང་ནུབ་ཕྱོགས་ཀྱི་ དཔེ་དེབ་ཚུ་ ལག་ལེན་འཐབ་མ་ཆོག་པའི་ཁར་ དམངས་གཙོའི་རིང་ལུགས་དང་ གསར་ཤོག་གི་དལ་དབང་ དྲང་ཁྲིམས་ཀྱི་ རང་དབང་ལ་སོགས་པའི་ཚིག་ཚུ་ཡང་ བརྗོད་མ་ཆོགཔ་སྦེ་ཨིན་པས།
ཤང་ཧའི་ལུ་ སྤྱི་ལོ་ ༢༠༢༡ ལས་ཚུར་ གཞི་རིམ་སློབ་གྲྭ་ཚུ་ནང་ ཨིང་ལིཤ་ལྷབ་སྦྱང་དེ་ སྡུག་སྦྱོང་གི་ གཞི་ཅིག་འབདཝ་ལས་ མཐའ་བཅད་ཆོས་རྒྱུགས་ཚུ་ནང་ ཨིང་ལིཤ་གི་ ཆོས་རྒྱུགས་དེ་ བཀག་དམ་འབད་ནུག་ཟེར་ བཀོད་འདུག་པའི་གནས་ཚུལ།

Please follow and like us: