ཀེ་ན་ཌ་གི་ས་གནས་ རི་ཡོ་ཊིན་ཊོ་ལས་ ལས་མི་འབག་མི་གནམ་གྲུ་གི་ ཐུག་རྐྱེན།

རོའི་ཊརཛ།
ཀེ་ན་ཌ་ལུ་ རི་ཡོ་ཊིན་ཊོ་ཟེར་མི་ ས་གཏེར་ལས་སྡེའི་ ལས་མི་ཚུ་འབག་མི་ གནམ་གྲུ་ཆུང་བ་ཅིག་ དི་ཡ་བིག་ཟེར་སར་ཡོད་མི་ རྡོ་རྗེ་ཕ་ལམ་གྱི་ གཏེར་ཁ་ལུ་ འཕུར་འགྲུལ་འབདཝ་ད་ ཀེ་ན་ཌའི་ ནུབ་བྱང་ཕྱོགས་ཀྱི་ ས་གནས་མཐའ་ཟུར་ཅིག་ནང་ ཐུག་རྐྱེན་བྱུང་སྟེ་ ལས་མི་ལ་ལོ་ཅིག་ལུ་ ཤི་རྐྱེན་བྱུང་ནུག།
ཨིན་རུང་ གནམ་གྲུ་དེ་ནང་ ལས་མི་ག་དེ་ཅིག་ཡོད་ག་དང་ ག་དེམ་ཅིག་ལུ་ ཤི་རྐྱེན་བྱུང་ཡི་ག་ དེ་ལས་ གནད་དོན་ག་ཅི་ལུ་བརྟེན་ཏེ་ ཐུག་རྐྱེན་བྱུང་བྱུངམ་ཨིན་ན་ཚུ་ གཏན་འཁེལ་སྦེ་ མ་ཤེས་པར་ཡོདཔ་ད་ གནམ་གྲུའི་ཇོ་བདག་གིས་འབད་བ་ཅིན་ གླ་ཁར་བཏང་མི་ གནམ་གྲུ་དེ་ནང་ འགྲུལ་པ་ ༡༩ རེ་ ཤོང་དོ་ཡོདཔ་སྦེ་ ཨིན་པས།
གནམ་གྲུ་དེ་ ཐུག་རྐྱེན་བྱུང་པའི་ཤུལ་ལས་ ཀེ་ན་ཌའི་ རྒྱ་འཛིན་མཁའ་དམག་ སྡེ་ཁག་གསུམ་གྱིས་ ཉེན་སྐྱོབ་དང་ འཚོལ་ཞིབ་ནང་ རྒྱབ་སྐྱོར་འབད་ཡོདཔ་ད་ གནམ་གྲུ་དེ་ཡང་ སི་ལེབ་རི་བར་ཟེར་མི་ གཙང་ཆུའི་ཉེ་འདབས་ལས་ཐོབ་ནུག།
ད་རེས་ ཞིབ་དཔྱད་སྡེ་ཚན་ཅིག་གིས་ ཞིབ་དཔྱད་ཚུ་འབད་དོ་ཡོདཔ་ད་ སྤྱི་ཟླ་ ༡ པའི་ཚེས་ ༢༢ ལུ་ཡང་ བི་རི་ཊིཤ་ ཀོ་ལམ་བི་ཡ་ལུ་ ཧེ་ལི་ཀོབ་ཊར་ཅིག་ལུ་ ཐུག་རྐྱེན་བྱུང་སྟེ་ མི་ ༣ ལུ་ ཤི་རྐྱེན་དང་ གཞན་མི་ཚུ་ལུ་ རྨ་སྐྱོན་ཚབས་ཆེན་བྱུང་ནུག་ཟེར་ བཀོད་འདུག་པའི་གནས་ཚུལ།

Please follow and like us: