ར་ཤི་ཡའི་ཁྲོམ་ཚོགས་ ཨོ་རེན་བཱག་ལུ་ ཆུ་འཁྱིལ་ཏེ་ གནོད་སྐྱོན་བྱུང་ཡོདཔ།

རོའི་ཊརཛ།
སྤྱི་ཟླ་ ༤ པའི་ཚེས་ ༡༣ ལུ་ ར་ཤི་ཡའི་ཁྲོམ་ཚོགས་ ཨོ་རེན་བཱག་ཟེར་སར་ གངས་བདའ་སྟེ་ཁཝ་ཚུ་ སྔོན་ཆད་མ་བྱུང་བའི་ ཚད་གཞི་ཁར་ མགྱོགས་དྲགས་སྦེ་ བཞུ་ནི་དེ་གིས་ གཙང་ཆུའི་ཆུ་གཞོང་ཚུ་ ཆུ་གིས་གང་སྟེ་ ཁྲོམ་ཚོགས་ནང་ ཆུ་འཁྱིལ་དོ་ཡོདཔ་ལས་ འགོ་དཔོན་ཚུ་གིས་ ཁྲོམ་ཚོགས་དེ་ནང་ སྡོད་མི་ཚུ་ ས་གནས་གཞན་ཁར་ དེ་འཕྲལ་ལས་ སྤོ་འགྱོ་དགོ་པའི་ བརྡ་སྐུལ་འབདཝ་ཨིན་པས།
དེ་བཟུམ་སྦེ་ ར་ཤི་ཡའི་ལུང་ཕྱོགས་ ཀུར་གཱན་ལུ་ཡང་ དྲོད་ཤུགས་ལུ་བརྟེན་ཏེ་ ཁཝ་དང་ ཁྱེགས་ཚུ་བཞུཝ་ལས་ གཙང་ཆུའི་མཐོ་ཚད་ཚུ་ ཡར་སེང་འགྱོ་དོ་ཡོདཔ་མ་ཚད་ ཁྱིམ་མཚེས་རྒྱལ་ཁབ་ ཀ་ཟ་ཀིཛ་ཏཱན་ལུ་ཡང་ ཆུ་འཁྱིལ་ནི་དེ་གིས་ མི་གྲངས་ ༡༠༠,༠༠༠ དེ་ཅིག་ ས་གནས་གཞན་ཁར་ སྤོ་དགོཔ་བྱུང་ནུག།
གློ་བུར་གྱི་ ལཱ་འབད་མི་ཚུ་གིས་ གཙང་ཆུ་ཡུ་རཱལ་གྱི་ མཐོ་ཚད་དེ་ ཉེན་ཁ་ཡོད་པའི་ མཐོ་ཚད་ལས་ མི་ཊར་ ༢ ལྷགཔ་ཅིག་ ཡར་སེང་སོང་ཡོདཔ་ལས་ ཁྲོམ་ཚོགས་ནང་ ཆུ་འཁྱིལ་ཏེ་ སྒྲིང་ཁྱིམ་ཚུ་གི་ སྒོ་ཅུང་དང་ ཤིང་ཆའི་མཛོད་ཁང་ཚུ་ལུ་ ཤུགས་སྦེ་ར་ཕོག་ནི་དེ་གིས་ རོ་ཁྱི་ཚུ་ཡང་ སྒྲིང་ཁྱིམ་ཚུ་གི་ ཐོག་ཁར་འཛེགས་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: