མི་རྗེ་བློན་ཆེན་མཆོག་གིས་ རྒྱལ་སྤྱི་ཉི་དྲོད་མཐུན་ཚོགས་ཀྱི་ ཡོངས་ཁྱབ་མདོ་ཆེན་དང་མཇལ་ཕྲད།

སྤྱི་ཟླ་ ༤ པའི་ཚེས་ ༡༦ ལུ་ མི་རྗེ་བློན་ཆེན་མཆོག་གིས་ རྒྱལ་སྤྱི་ཉི་དྲོད་མཐུན་ཚོགས་ཀྱི་ ཡོངས་ཁྱབ་མདོ་ཆེན་ ཌོག་ཊར་ཨ་ཇཱེ་མ་ཐུར་དང་གཅིག་ཁར་ མཇལ་ཕྲད་མཛད་ཡོདཔ་ཨིན་པས།

དེ་བསྒང་ མི་རྗེ་བློན་ཆེན་གྱིས་ ད་རེས་ འབྲུག་གི་དོན་ལུ་ ཆུར་བརྟེན་གློག་མེ་དེ་ ནུས་ཤུགས་ཀྱི་ ཐོན་ཁུངས་གཙོ་བོ་ཅིག་ཨིན་རུང་ མ་འོངས་པའི་ ལོ་ཚུ་ནང་ ཉི་དྲོད་དང་འདྲ་བའི་ སླར་བྱུང་ནུས་ཤུགས་ཀྱི་ འཐོན་ཁུངས་ཚུ་ གལ་ཆེཝ་སྦེ་ར་ དགོས་མཁོ་འབྱུང་ནི་ཨིན་པའི་ ངོས་ལེན་མཛད་ནུག།

དེ་མ་ཚད་ འབྲུག་ལུ་ ཉི་དྲོད་ནུས་ཤུགས་ ཡར་འཕེལ་གྱི་དོན་ལས་ རྒྱལ་སྤྱི་ཉི་དྲོད་མཐུན་ཚོགས་ཀྱིས་ བརྩོན་ཤུགས་བསྐྱེད་མི་ལུ་ ངལ་རངས་ཡོད་ལུགས་དང་ འབྲུག་གི་ནུས་ཤུགས་ལས་སྡེའི་ནང་ རྒྱ་གར་གཞུང་གིས་ རྒྱབ་སྐྱོར་འཕྲོ་མཐུད་དེ་ར་ མཛད་མི་དེ་ལུ་ཡང་ བཀའ་དྲིན་དགའ་ཚོར་ཡོད་ལུགས་ཚུ་ གསུངས་ཡོད་པའི་གནས་ཚུལ།