བྱང་ཀོ་རི་ཡ་གིས་ མགྱོགས་ཤུགས་ཅན་གྱི་ ཐག་རིང་མི་ཛ་ཡེལ་བརྟག་དཔྱད།

སི་ཨེན་ཨེན།
སྤྱི་ཟླ་ ༡༠ པའི་ཚེས་ ༣༡ ལུ་ བྱང་ཀོ་རི་ཡ་གིས་ གླིང་ཆེན་ཚུ་ནང་ ལྷོད་ཚུགས་མི་ མགྱོགས་ཤུགས་ཅན་གྱི་ ཐག་རིང་མི་ཛ་ཡེལ་ བརྟག་དཔྱད་འབད་ཡོདཔ་ད་ དེ་ཡང་ བྱང་ཀོ་རི་ཡའི་ མི་ཛ་ཡེལ་ཚུ་གི་གྲས་ལས་ ས་ཐག་རིང་སར་ འཕུར་ཚུགས་མི་ཨིན་པས།
མི་ཛ་ཡེལ་ བརྟག་དཔྱད་དེ་ ཡུ་ཨེཛ་ལུ་ སྲིད་འཛིན་བཙག་འཐུ་འབད་ནི་གི་ ཉིན་གྲངས་དག་པ་ཅིག་གི་ཧེ་མར་ ལག་ལེན་འཐབ་ཡོད་ད་ དེ་གི་ཧེ་མར་ ལྷོ་ཀོ་རི་ཡའི་ གསང་ཞིབ་ལས་སྡེ་གིས་ བྱང་ཀོ་རི་ཡ་གིས་ དེ་བཟུམ་མའི་ མི་ཛ་ཡེལ་ཚུ་ ཡུ་ཨེཛ་གི་ བཙག་འཐུའི་དུས་ཚོད་ཁར་ བརྟག་དཔྱད་འབད་ནི་བཟུམ་ཅིག་ཡོད་པའི་ ཉེན་བརྡ་འབད་ནུག།
མི་ཛ་ཡེལ་དེ་ བརྟག་དཔྱད་འབད་བའི་སྐབས་ལུ་ ཀི་ལོ་མི་ཊར་ ༡,༠༠༠ དེ་ཅིག་གི་ས་ཁར་ ལྷོད་ཚུགས་ཡོདཔ་ད་ རྒྱ་པཱན་གྱི་ དབང་འཛིན་ཚུ་གིས་འབད་བ་ཅིན་ མི་ཛ་ཡེལ་དེ་ གནམ་ཁར་སྐར་ཆ་ ༨༦ དེ་ཅིག་ འཕུར་བའི་ཤུལ་ལས་ ཨོ་ཀུ་ཤི་རི་མཚོ་གླིང་གི་ ནུབ་ཕྱོགས་ཁ་ཐུག་ལུ་ རྒྱ་མཚོའི་ནང་ བུད་ཡོདཔ་སྦེ་ཨིན་པས།
བྱང་ཀོ་རི་ཡ་གིས་ དེ་བཟུམ་མའི་ མི་ཛ་ཡེལ་ བརྟག་དཔྱད་དེ་གིས་ འཛམ་གླིང་ནང་ དེང་དུས་དང་ ཡིད་ཆེས་རུང་བའི་ སྟོབས་ཤུགས་ཅན་གྱི་ བཟློག་ཐབས་ཅིག་ཨིན་པའི་ བརྡ་མཚོན་སྟོན་ཡོདཔ་སྦེ་བཤད་ནུག།
གནད་དོན་དེ་ལུ་ ཡུ་ཨེཛ་གི་ཁ་ཐུག་ལས་ བྱང་ཀོ་རི་ཡ་གིས་ མི་ཛ་ཡེལ་ བརྟག་དཔྱད་དེ་ འཛམ་གླིང་སྤྱི་ཚོགས་ སྲུང་སྐྱོབ་ཚོགས་སྡེའི་ གྲོས་ཆོད་ཚུ་ལས་ འགལ་བ་ཨིན་པའི་ ཉེས་ཁ་བཀལཝ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: