མི་དབང་རྒྱལ་ཡུམ་སྐུ་བགྲེས་མཆོག་གིས་ ཟངས་མདོག་དཔལ་རིའི་ ཀི་དེབ་འགོ་འབྱེད།

མི་དབང་རྒྱལ་ཡུམ་སྐུ་བགྲེས་ སྐལ་བཟང་ཆོས་སྒྲོན་དབང་ཕྱུག་མཆོག་གིས་ འབྲུག་ལུ་ གུ་རུ་རིན་པོ་ཆེའི་ པདྨ་འོད་ཀྱི་ཕོ་བྲང་གི་ བླ་ན་མེད་པའི་ དངོས་སྣང་ཟེར་མི་ ཟངས་མདོག་དཔལ་རིའི་ ཀི་དེབ་ཅིག་ འགོ་འབྱེད་མཛད་གནང་ནུག།
དེ་བསྒང་ གཞུང་གྲྭ་ཚང་གི་ ཡོན་ཏན་སློབ་དཔོན་ སྤྲུལ་སྐུ་རྣམ་རྒྱལ་དང་ ཨ་ཞེ་བཀྲིས་རྡོ་རྗེ་ མི་དབང་རྒྱལ་སྲསམོ་ པདྨ་ལྷ་སྒྲོན་དབང་ཕྱུག་ དེ་ལས་ མི་དབང་སྐུ་འཁོར་ལྷན་རྒྱས་ཚུ་ཡང་ བྱོན་གནང་ཡོདཔ་ད་ མཐའ་ཡས་ལེན་དང་ འབྲུག་ལས་ ཀི་དེབ་རྩོམ་སྒྲིག་འབད་མི་སྡེ་ཚན་གྱིས་ཡང་ གྲལ་གཏོགས་འབད་ཡོདཔ་ཨིན་པས།
བུམ་ཐང་སྐུ་རྗེས་ཀྱི་ ཟངས་མདོག་དཔལ་རི་དེ་ སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ་དང་ མི་དབང་རྒྱལ་ཡུམ་སྐུ་བགྲེས་ དེ་ལས་ མ་ཡུམ་ཆོས་དབྱིངས་དབང་མོ་རྡོ་རྗེ་ཚུ་གིས་ ཆོས་ཕྱོགས་ཀྱི་ འབྲེལ་དོན་གཟབ་མོའི་ བརྡ་མཚོན་ལུ་ བཀེངས་གནང་ཡོདཔ་ད་ ཀི་དེབ་དེ་ནང་ རྫོང་གསར་འཇམ་དབྱངས་མཁྱེན་བརྩེ་མཆོག་གིས་གནང་པའི་ ཆེད་བརྗོད་དང་ མཧཱ་གུ་རུའི་ སྨོན་ལམ་གྱིས་གཙོས་པའི་ གུ་རུ་རིན་པོ་ཆེའི་ སྨོན་ལམ་ཚུ་ཡང་ཡོདཔ་སྦེ་བཀོད་ནུག།
ཀི་དེབ་བཀྲམ་སྤེལ་གྱི་ ཁེ་འབབ་ཡོངས་རྫོགས་ མི་དབང་རྒྱལ་ཡུམ་སྐུ་བགྲེས་ སྐལ་བཟང་ཆོས་སྒྲོན་དབང་ཕྱུག་མཆོག་གི་ བློ་གཏད་མ་དངུལ་ནང་ བཙུགས་ཐོག་ལས་ ལྷ་ཁང་དགོན་སྡེ་ ༥༠༠ ལྷགཔ་ཅིག་གི་ འཚོ་རྟེན་དང་ ཤེས་ཡོན་ གནད་འགག་ཆེ་བའི་ གསོ་བའི་ཞབས་ཏོག་ མི་ཏོག་རྒྱུན་སྐྱོང་དང་ ཀེན་སར་སྨན་བཅོས་ མཁྲིས་པའི་སྨན་བཅོས་ ཡུན་རིང་ནད་འཚུབ་ཀྱི་ སྨན་བཅོས་ཚུ་གི་དོན་ལུ་ ཟད་འགྲོ་གནང་ནི་ཨིན་པའི་གནས་ཚུལ།

Please follow and like us: