ཤྲཱི་ལངྐ་ལུ་ འབྲུག་གི་གཞུང་ཚབ་ དྲག་ཤོས་ཀརྨ་ལྷ་མོ་རྡོ་རྗེ་གིས་ ཤྲཱི་ལངྐའི་ སྲིད་འཛིན་མཆོག་ལུ་ གཞུང་ཚབ་ངོ་སྤྲོད་ཡིག་ཆ།

སྤྱི་ཟླ་ ༧ པའི་ཚེས་ ༢༤ ལུ་ དྲག་ཤོས་ཀརྨ་ལྷ་མོ་རྡོ་རྗེ་གིས་ ཤྲཱི་ལངྐའི་སྲིད་འཛིན་ མི་རྗེ་ཨ་ནུ་ར་ ཀུ་མ་ར་ དི་ས་ན་ཡ་ཀ་མཆོག་ལུ་ འབྲུག་གི་གཞུང་ཚབ་ཀྱི་ ངོ་སྤྲོད་ཡིག་ཆ་ཚུ་ ཕུལ་ཡོདཔ་ཨིན་པས།
དེ་ཡང་ བངལ་དེཤ་གི་རྒྱལ་ས་ ཌ་ཀ་ལུ་ གཞི་གནས་ཐོག་ལས་ ཤྲཱི་ལངྐ་ལུ་ཡང་ འབྲུག་གི་གཞུང་ཚབ་ཨིན་མི་ དྲག་ཤོས་ཀརྨ་ལྷ་མོ་རྡོ་རྗེ་གིས་ ཤྲཱི་ལངྐའི་ སྲིད་འཛིན་གྱི་ ཡིག་ཚང་ནང་སྦེ་ རྟེན་འབྲེལ་བརྩི་སྲུང་ཐོག་ལུ་ཕུལ་ནུག།
དེ་སྦེ་ ངོ་སྤྲོད་ཡིག་ཆ་ཚུ་ ཕུལ་ཚར་བའི་ཤུལ་ལས་ མི་དབང་མངའ་བདག་རིན་པོ་ཆེ་མཆོག་དང་ མི་རྗེ་བློན་ཆེན་ འབྲུག་གི་མི་སེར་ཚུ་གི་ཧོངས་ལས་ ཤྲཱི་ལངྐ་གིས་ འབྲུག་པའི་སློབ་ཕྲུག་ཚུ་ལུ་ དམིགས་བསལ་གྱིས་ གསོ་རིག་སྦྱང་བརྩོན་ཚུ་ནང་ གཏོང་ཕོད་ཅན་གྱི་ རྒྱབ་སྐྱོར་མཛད་མི་ལུ་ བཀའ་དྲིན་དགའ་ཚོར་ཡོད་ལུགས་དང་ རྒྱལ་ཁབ་ ༢ ཀྱི་བར་ན་ ཡུན་བརྟན་མཐུན་ལམ་ གཏིང་ཟབ་བཟོ་ནི་གི་ ཁས་ལེན་ཡོད་ལུགས་ཡང་ ཞུ་ཡོདཔ་ཨིན་པས།
དེ་མ་ཚད་ དྲག་ཤོས་ཀརྨ་ལྷ་མོ་རྡོ་རྗེ་གིས་ ཤྲཱི་ལངྐའི་ འགོ་དཔོན་ཚུ་དང་གཅིག་ཁར་ ཟུང་ཕྱོགས་ཀྱི་ གནད་དོན་དང་ མོས་མཐུན་ཅན་གྱི་ མཐའ་དོན་གསརཔ་ཚུ་གི་སྐོར་ལས་ཡང་ གསུང་གྲོས་ཚུ་ གནང་ནི་ཨིན་པའི་གནས་ཚུལ།

Please follow and like us: